فاكر

زمان ؟ قصدي يعني أيام ماكنت لسة طفل ؟ طفل بجد!
أيام ماكنت بتحلم تبقي زي كونان ؟ أيام ماكنت بتجري علي ابوك اول مايجي من الشغل ؟
أيام ماكنت بتركب علي ضهره وهو بيصلي ؟ طيب فاكر أيام السكوتر و العجلة ؟
طيب فاكر ايام المدرسة و الفسحة ؟ أيام لبس المدرسة اللي كنت بتكره ؟ أيام الشنطة اللي بعجل ؟
طيب فاكر لما كان حد بيسألك عايز تطلع ايه تقوله دكتور او مهندس ؟
طيب فاكر شكل العيد زمان ؟ اللمة و الضحك و البومب ؟
طيب فاكر رمضان و الفوازير ؟ طيب فاكر أول مرة تصوم فيها ...... لحد الضهر!
طيب فاكر أول مرة زعقت وقولت انا خلاص كبرت ؟ طيب و أول مرة حبيت ؟ فاكرها ؟ اول خروجة , أول هدية وأول مكالمة في التليفون بالليل ؟
طيب فاكر أيام الثانوية ؟ فاكر الدروس و التزويغ و الخنصرة و الصياعة بعد الدرس ؟
طيب فاكر قعدة كوسنا و ستار بكس و المذاكرة و الفشل ؟
طيب فاكر ايام الامتحانات ؟ فاكر وقفة امك علي باب المدرسة مستنياك تنزل ؟ طيب فاكر صاحبك الدحاح اللي ينزل يقول زفت و جاب 99 ؟
طيب فاكر النتيجة ؟ وحلمك اللي ضاع ؟
طيب فاكر لما أبو صاحبك مات ؟ فاكر حسيت بالخوف قد أيه علي اهلك ؟ فاكر لما حسيت انهم كبروا اوي ؟
طيب فاكر لما كان نفسك تكبر ؟
أديك كبرت!