برقيات عاجلة

مبعرفش أدارى وأخبى وكلامنا حيكون بالبلدى ، وبرقياتى الأسبوع ده حتكون فى برقية واحدة يعنى المعنى واضح وكلامى على عينك يا تاجر
من غير ترتيب أو تنظيم لأفكارى أو مرئياتى هقول كل عندياتى
ياعم الحاج ببلاوى لو تركت الحكومة هقول ربنا يطول بعمرك ويديك الصحة والعافية ووالله هتكون عملت خير ليك ولنفسك ولبلدك ووطنك، ولو هتطول وتطنش وتسقع دماغك وتقول ودن من طين وودن من عجين يبقى الله يقصف عمرك وعمر حكومتك وعمر إلى إختارك رئيس حكومة إنت وكل إلى معاك من وزراء ، فيهم قليل ماشى حالهم بس يغوروا من وشك ووش الباقيين
ياراجل يامخرفاتى هوه إنت لسه عاوز تتأكد إن الإخوان جماعة إرهابية، طيب إذا إنت أعمى البصر والبصيرة، قاعد فيها ليه يا أهبل يابن العبيطة، متسيبها وتغور ويلعن أبوا يوم إلى فيه حد إختارك إنت والى إختارك
الإرهاب قاعد بيفكر ويخطط بالصوت والصورة وعلى الهوا وعلى عينك ياحكومة وبيقولكوا حطلع عين أبوكوا يامصريين إنتوا وإلى بيحكمكوا يا إنقلابيين ، ورغم إنهم قلة وقليلين ، وفجرة وكافرين ، بس شايفينكم عجزة وخايبين، وبيهددوكم وبيهددونا وحضرتك وحضرات حكومتك ولا انتوا هنا ولا فارقه معاكوا
أسامه الدليل قالكم بالدليل مصر محاطة بالإرهاب الجغرافى ، يعنى الإرهاب بيلعبلنا فى الصومال وأثيوبيا ، واليمن وليبيا ، ومش هقولكم على حماس وإسرائيل مهو اللعبة ملعوبه والكل شايفها ، والمؤامرة محبوكه والكل قريها، وعاوزين يقفلوا المندب ، ويخلونا عليها نندب، وكل ده ضغط على إلى مش عاوزين ضغط لأن فى البدية وأصل الحكايه اللعبه لعبتهم ، ماما أمريكا والأرجوزات فى أوربا والست أشتون عمتهم وخالتهم والشاذة بتاعتهم
ياناس سد الألفيه سموه نهضة ويارب تكونوا منسيتوش رابعة والنهضة وبايعين مصر لأعداء مصر ، سامع ياحاج ببلاوى ولا بقيت أعمى وأطرش
يا مستشارنا يارئيسنا ياعم عدلى عارفينك إنتقالى وعاملينك إمامنا، مش هنعرفك شغلك، بس محدش بيواجة إرهاب بالقانون ، لأن القانون جنائى ، لكن الإرهاب بيقتل وطن ، بيقتل أمة ، بيقتل شعب وحضارة، بيقتل تاريخ وبيهدم أمم
قرار سيادى منك يقول دول (( جماعة إرهابية )) يثبت شجاعتك وشجاعة شعب هانت علية حياتة يوم قرر يسترد الوطن من إرهاب جائر ميعرفش ضمير ولا حق ولا عدل ولا حتىى قيمة إنسان ضحى بحياته من أجل الوطن
الله عليك ياسيسى إنت وجنودنا وشرطة مصر الأبية ياحماة الوطن والأمة