يوميات مواطن غلبان 3 (العيد فرخة)

كل عام وحضراتكم بخير وصحة وسلام بمناسبة عيد الاضحى المبارك ولا بلاش المبارك دى لحد يفهمنى غلط ونخليها السعيد احسن.
فاكرين طبعا العيد زمان ايام اجدادنا العظام اللى كان رطل اللحمة عندهم
بكام سحتوت وقرش ليس اكثر واللى لو عاشوا لحد ايامنا دى كانوا ماتو الف مرة من جنون الاسعار والمسعرين من السادة التجار والمسئولين ربنا يجعل كلامنا خفيف عليهم زى دمهم الخفيف المهم جنون الاسعار هذا جعل الفرخة لمن يستطيع الحصول عليها ويضحى بها فى عيد الاضحى هى اكبر واعظم فرحة ويبفى فعلا عندهم العيد فرخة وليست فرحة .
لا اعلم سر نوبة الضحك والهستيريا التى اصابتى منذ ان ابتلانى الله بسماع شعار اعمام اللى خلفونا فى الحزب الكبير الحاكم والمتحكم فى البلاد والعباد منذ ان ولد اخى الاصفر منى بست سنوات مع العلم ان عمرة الحالى 35 عام تصدقوا اول مرة اخدبالى انى كبرت وعجزت ولكن الحمد لله اننى عاصرت الثلاث عهود اليتيمة فى هذا البلد المنسى والمتناسى والصابر على ما هو فيه .نرجع تانى للشعار اياه وهو علشان مستقبل اولادك طيب دا بخصوص المستقبل والحاضر نعمل فيه ايه؟ اليسوا اولاد اليوم ورجالها اللى بيربوا هؤلاء الاولاد اولى بالرعاية؟ علشان يقدروا يطلعوا جيل ان عاش يقدر يستفيد من هذا البرنامج ولم يمت هو واللى خلفوه من الفقر والجوع ؟ اللهم الااذا كان الحزب الهمام عمل هذا البرنامج لمن سوف يبقى من هذا الشعب. ياسادة قدموا لنا الطعام والعمل والمسكن والملبس الان .فكروا فى مشاكل الحاضر اولا ولا تهربوا الى المستقبل وعلى رأى المثل احيينى اليوم وموتنى بكره. ولو سمحتوا ممكن تجاوبوا على هذا السؤال: مادمتم عجزتم عن حل مشاكل الكام مليون الموجودين الان فكيف سوف تبغددوا وتدلعوا الملايين اللى جاية ؟وانتم فى كل لقاء ومناسبة بتقولوا الناس بتزيد وبنكتر كل يوم عن اللى قبله ؟ افيدونا يرحمنا ويرحمكم الله0