المقامة السمعية

قال حنفي بن تامر :-
رحت اسأل شيخ زغلول , عن فزورة بتقول , (اصوات ما بنسمعهاش , ولغات ما بنفهمهاش) , بص لي باندهاش , وقال لي : هاجاوبك حاضر , انا عندي الرد حاضر ... اسمحلي افهمك , بعد ازنك شيء , بسيط.. كل شيء , حواليك بيكلمك ..أعضاءك بتكلمك , وتقولك : اتقي الله , فينا يا عبد الله , وقبرك بيكلمك , ويقولك: انا موجود , بيت الوحشة والدود , ويومك بيكلمك , ويقول : انا يوم جديد , على عملك شهيد , وربك بيكلمك , بالرؤية الصالحة ,الهادية المفرحة , والايحاء النوراني , والايماء الرباني:- ( ماكان الله ليكلم بشرا الا وحيا او من وراء حجاب ) ...مش ربنا يا فندم , حكالنا انه كلم , ام نبينا موسى , - بالايحاء - عن موسى :- ( واوحينا الي ام موسى ان ارضعيه فاذا خفتي عليه فألقيه في اليم ) ,( واوحينا الى امك ما يوحي ) .
شوف هنا (ام موسى) , ربنا فقط اوحالها , لا كلمها ولا حكالها , زي ما كلم موسى !! , وفي الحديث الطويل , قال الرسول الجميل :- ( واعظ الله في قلب كل مسلم ) ..يعني المسلم المطيع , لازم يسمع ويطيع , (كلام الله) وضميره , يفكره بمصيره , ( قالوا سمعنا واطعنا غفرانك ربنا واليك المصير )
ابليس بيكلمك , بالنزغ والوساوس , والوعد والهواجس , ( من شر الوسواس الخناس , الذي يوسوس في صدور الناس ) ..نفسك بتكلمك , بتوسوس لك بهدوء , وبتأمرك بالسوء ( نحن خلقنا الانسان ونعلم ما توسوس به نفسه ) !!!
دة الحيوان بيكلمك , لو انت قاعد بتاكل , فمكان وجاتلك قطة , هتقولك : ازيك؟ , انا جعانة زيك , ممكن تديني حتة ؟ , علشان انا عاوزة آكل , والا حتقولك (نو)؟ , قولتله : حتقول لي (نو ) !! , قال : طب لو كلب جعان , هيقولك : انا جعان , على لحم بطني والنعمة , ممكن تديني لقمة ؟ , والا حيقولك (هو ) ؟؟ , قولتله : هيقوللي (هو )
قال لي : كل حيوان , بيتكلم بلغته , ومفكر ان لغته , بيفهمها الانسان , ودة لأن الانسان , هو خليفة الله , في ملكوت الله , هوا حامل الامانة , الكونية الالهية , على كتفه المسئولية :-
( انا عرضنا الامانة على السماوات والأرض فابين ان يحملنها وحملها الانسان )
والفكرة هنا , انت بتسمع صوت عقلك , والا بتسمع صوت قلبك ؟
وعلى راي باهي , في كتابه الزاهي , ( يا لاهي عن إلهي ) :- لكل صمت صوت , وعلى راي ابن طنط , في كتابه ( جينا , من بعد ما هجينا ) :- كل شيء حولينا , بيسبح لله , واحنا مش فاهمين , ولا حاسين ولا سامعين , تسبيحهم لله ( ولكن لا تفقهون تسبيحهم )
قولتله : لها تفسير علمي؟ , قال لي : على حد علمي , انا ان الاصوات , موجات وترددات , والقدرات البشرية , طبعا محددة , بمقدار وبمدى , انت ما تقدرش تسمع , موجة تحت سمعية , ولا موجة فوق سمعية , لكن تقدر تسمع , الموجة السمعية !!
قولتله : طب واللغات؟؟ , قال : دي متعددة , بين الناس مش كدة ؟ , اللغة فتنزانيا , غير اللغة فرومانيا , واللغة فالمانيا , غير اللغة فالبانيا , واللغة في سوريا , غير اللغة في كوريا , واللغة فاستراليا , غير اللغة في ايطاليا !!
حتى ف الدولة الواحدة , ما بتلقاش لهجة واحدة , تلقى اللهجة ف الصعيد , مختلفة عن بورسعيد , واللهجة ف السلوم , مختلفة عن الفيوم , تلقى اللهجة النوبية ,غير اللهجة البدوية , الى آخر اللهجات , حتى في الوطن العربي ,كله بيتكلم عربي , وبتختلف اللهجات , اللهجة اللبنانية , غير اللهجة السودانية , واللهجة المصرية , غير اللهجة القطرية , واللهجة الجزائرية , غير اللهجة السورية !! على راي ابن عدوية , فكتابه الخطير ( أعمالنا يدوية , ورجالنا بدوية ) :- من الآيات البينة ......اختلاف الألسنة
وعلى راي رامي , فكتابه ( الحرامي , قفشوه وعكشوه , وبكام علقه عشوه ) :-
ممكن واحد يقضي طول عمره يدرس انجليزي
ويموت وهو مش عارف كلمات يامة ف الانجليزي
وعلى راي حسنين , هريدي محمدين , فكتابه (كن محترس , م المفتري المفترس ) :-
ممكن واحد يقضي طول عمره يدرس لغات
ويموت وهو مش عارف الا يدوب لغه واحدة بس !!
ممكن واحد يقضي طول عمره يسمع لهجات
ويموت وهو مش عارف الا لهجة واحدة بس !!
قال حنفي بن تامر :- قولتله : حسنين , هريدي محمدين , دة راجل مخه مصدي , ازاي واحد يقضي , عمره يدرس لغات , ويموت وهو مش عارف , الا لغة واحدة بس , ايه مثلا نسي اللغات , وبعد كدة طب مات ؟؟ , قال لي: بطل غباء , يا ابني لحم العلماء , محرم ومسموم , اللى بيقرب ليهم , او بيذم فيهم , يقذف بحجر مسوم !! , سيدي حسنين , هريدي محمدين , راجل مات من سنين , ورب العالمين , رفع له سيرته وذكره , وحفظ له كتبه وفكره , على مدار السنين , .. سيدي حسنين , هريدي محمدين , كان راجل علامة , قولتله (بانفعال) , ايه ياعم مالنا ومال , استاذ راغب علامة ؟؟ !! , شكلك شبه حسنين , هريدي محمدين , بتعك ف الكلام , اقولك حاجة ..سلام , ومشيت وسبته ألون, وأنا على وشي لون , الزعل لأني حزين , ان احنا لاغيين جهودنا , ومنحازين لجدودنا , الجهلة الأميين , في الغلط وفي الصح , مش يمكن احنا أصح ؟ , بتفكيرنا الابداعي , وعلومنا الحديثة , والتكنولوجيا الحديثة, والا دة كله مالوش داعي !!! , ...
أصلا الدنيا بتبقى , منغير الابداع خنقة !! , لحد امتى هنفضل , نحارب العلماء , ونقتل الأنبياء , والسادة المبدعين , في كافة الميادين؟ , لحد امتى هنفضل , كدة نكدب الآية , ونصدق الرواية؟؟ !! , ونمشي بانتظام , ورا موروثات قديمة , خاطئة ولا ليها قيمة , زي عصور الظلام !!
واللى يخالف الكنيسة ...يعدم عشان (هرطيق)
واللى يخالف الأزهر ... يعدم عشان (زنديق)
على رأي على العماني , الكاتب العلماني :- (من يعادي العلم يعاني الجهل)
مش ربنا اعذرنا , وانذرنا وحذرنا, من اننا نلغى عقولنا , ونمشي ورا كلام جدودنا , وقال فكتابه ونورنا)وإذا قيل لهم تعالوا إلى ما أنزل الله وإلى الرسول قالوا حسبنا ما وجدنا عليه آباءنا أولو كان آباؤهم لا يعلمون شيئا ولا يهتدون ) ...والختام