أنا متمرد

مدد ع اللي خون موقف الولد
مدد ع اللي باع فينا بلا مستند
واللي قسم واللي فرق واللي وعد
مدد ع اللي رافض حريتي
وسكن ضلوعي جوا فكرتي
مدد ع اللي وعد واللي خلف ,, مدد
مدد ع مولانا اللي فاكر السلطة بالعافية
وكلامي وكلامك مجرد تهييس وقافية
مدد ع قنديله ,, نور ليالينا بالعافية
كام ليلة نورك يابلد ضلم
ولما صرخت قالوا بنوفرلك ,, بلاش تظلم
ولما صرخت بلادي ,, نهرك شريان فؤادي
باعوه ,, صدروه ,, وسابوا الصهاينة يشربوه
ولما صرخت ,, قالوا عميل ,, متمرد ,, دخيل
وبقيت صارخ في الميادين بأقول مدد
وتاني هأقول مدد ع اللي قتل الولد
واللي حرض واللي هدد واللي سجد
مدد ع اللي باع قضيتي
وكفر فيا فكرتي
ولما صرخت فيا يابلد غربتي ,, كفروني
أنا المسلم الموحد بالله الحافظ سنتي
رغم عنكم دي هي سكتي
أنا الثاير ألف مرة في قلب الميدان
الواقف في وش مية مية طوفان
لايهدني كلام خاين ولا عميل ولا إخوإن
أنا المصري المتشرب من نيلك
أنا اللي لسة بالف أجمع تراب جيلك
أنا الحامي لفكرتي ,, رافع لواء حريتي
أنا الميت ألف مرة في تكويني
أنا العاشق لترابك رغم حاولوا مرات تلويني
ومدد ع اللي سكت
خطفوا زينة شبابك وقتلوا حمرة فؤادك
ويتموا من ولادك وزودوا السواد في أيامك
ولما صرخت ,, قالوا مستبد
طيب مدد ,,
ياعايش مغمي عنيك في سكة مولانا
عمالين يشدوا فيك والغربة سكنانا
أنت اخويا ولا أنت غريب عايش حدانا
مدد ع اللي علمك تقول آمين لغير دعانا
واللي سكنك ضلوع غريبة بتكسر حدانا
واللي علمك كلمة من اربع حروف
كلمة مليانة هروب وخوف
كلمة سموها انها بحكم الظروف
قالوا "جهاد" وموتوا فينا الحياد
الجهاد ياخوانا ع الحدود
لما تقف قدام يهود
الجهاد لم يهتكوا عرضك
ويستبيحوا حرمة دمك
ولما يكونوا يهود
ولما حرم دمنا سيدنا النبي
بأي حق بتطلبوه
وبالفتاوي بتكفرونا وبتحللوه
يامعذبين فينا الأمل
ومسكنين روحنا ضفاف المحتمل
أنا متمرد مهما طال الأجل
أنا بيك مش معترف
ارجوك كفاية واعترف
انك خلاص بقيت كان وانصرف
كفاية مهانة وذل وإهانة
يابلد واخدانا لسكة عميانة
قولتلي عميل ,, وخاين وذليل
أنا عميل وهو عميل وكلنا عميل
فوق بقى وكفاية تضليل
عاشت حريتي وعاش جيشي ويا شرطتي
وعاش الأمل اللي اتولد في سكتي
وعاش الضي اللي سكن ضلمتي
إرحل بلا كلام ,, كفياك ملام
أنا لو هألوم ,, هألوم الأيام
اللي خلتني إخترت جماعتك بإستسلام
واللي خلتني أضرب للي قتلوا السادات تعظيم سلام
واللي خلتني أكون طرف لنزيف بلد وألام
أنا متمرد وهأتمرد مهما طالت الأيام
فأرجوك كفاية كلام .