من أول السطر

فى صفحة بيضا بِكر
من كراسة الزمن
بعطر الحياة
متعطره
سطرها القدر
والقلم
أثبت جدارة
فض البكارة
كتب المقدر والقضا
من أول لآخر سطر
معدتشى الصفحة بكر
لكن لسه بيضا
متعطره
وكل كلمة متلونة
بلون القدر
أدى كلمة زرقا
بلون السما
دافية دفا
لعبت فى أيام الصَفا
و كلمة بحروف متبعترة
متلونة بلون الشقاوة
متشكلة
متنقية أحلى نقاوة
وكلمة مفتولة وعفية
متلونة بلون الأرض
مصرية
شغالة بالفاس والغلق
متزينة بحبات العرق
وكتب القلم بالصبر
كلام يتوزن بالتبر
وتعظيم سلام لكلمة
ببنط عريض
كبرت بقت عنوان
اتنقلت فى وسط السطر
تحتها التفاصيل
كلمة منورة بالليل
دفيانة فى حضن النيل
متفرعة فرعين
فرع لأدب محفوظ
وفرع لفيمتو زويل
ودى كلمة متلخبطة
تايهة
حروفها بالملايين
مش عارفة تقعد فين
فى كلمة مزحومة
حروف بتتسابق
فى مسابقة محمومة
فى رول ملوش ترتيب
إعلان بدون تبويب
ورجعت ريمة
ورجعت حروف
معتش ليها زمان
مش لاقيه ليها مكان
معاها ميت عداد
بتعد فى الأزمات
ناسية إن فيها جنين
بيدور فى أحشائها
بيلملم حروف كلمة
من حبلها السرى
نزل الخلاص
صرخ الوليد صرخة
زلزلت فرعون
إحنا اللى فرعناه
واحنا اللى زلزلناه
اتلمت كل الحروف
فرحانة بالمولود
اللى نطق فى المهد
"خلاص المهر اندفع
وريمة مش راجعة"
عضو رابطة شعراء العامية المصرية