زناتى وخليفة والجميلة بطة

الواد زناتى
سهران ليلاتى
يلعب قمار
رهن البيت
باع الحمار
اصل زناتى واد فلاتى
والفلاتى
عمر ما يعرف طريق العمار
ركبه العار
استجار
بعمه خليفة
بياع الليفة
جنب الخضار
خليفة قال لزناتى
اوعى بناتى
لكويك بالنار
قاله يا عمى
دمك دمى
وبناتك همى
ليل ونهار
خليفة اعطاه الامان
وعامله باحسان
زناتى شاف البنات
عقله طار
شيطانه لعب على الاوتار
رسم الخطة
يخطف بطة
ويدخل بيها جوه قرار
عمل العاملة
وذى النملة
بلغ فرار
وساب البطة
ذى القطة
تنونو مرار
خليفة عرف العاملة
لبس الشاملة
وقال يا كاملة
ان كتب علينا العار
ومن النهار
انا سايب الدار
وما هرجع الا ودمه فى ايدى
اوعى هريدى
والتلات بنات
العام اهو فات
وراه سنوات
وخليفة داير فى البلاد شغال حكايات
زناتى شاف خليفة من غير ما يشوفه
ركبه خوفه
وقال يا نهار اسود الالوان
انا لازم اغيرالعنوان
شال الشنطة وع المحطة
مستنى القطار
لمحه خليفة بطرف عينيه
كان شيال يا عينى عليه
ساب اللى فى ايده وطار عليه
شق الصفوف
قتل الخوف
ومن غير ما يشوف
قاله شرفت يا بيه
زناتى بص وراه
لسانه قال الاه
عيارين فى دماغه كانوا ساكنين
والناس شايفين
لكن من الذهول ساكتين
جرى خليفة والشرطة وراه
مسكه الظابط من قفاه
رماه على الارض
صرخ خليفة ياولداه
يابيه العرض
يابيه العرض
هو اللى جاب دماغى الارض