الغربة

عبدالعزيز المنسوب
الغربة
كل اللي عاش أهو شاف
الغربه مش فسحه
الغربه فرقة وطن
مش لعب أو مزحه
الغربه همّ وغمّ
مع ضغط مع قرحه
فلوس بتيجي تروح
ولا عمره شاف فرحه
تجري السنين وتْفُرّ
عمره هناك بِيْمُرّْ
محروم من الأحباب
عِيشْة الغريب ما تْسُرّْ
محبوس وكلمة آه
تطلع بطعم المُرّْ
حقّ الغريب بيضيع
كاتم في قلبه السرّ
واصعب ما في الغربه
إنّك تودع أبوك
أو تِتْحِرِمْ م الأم
أو م الولد وأخوك
وبعيد عن الزوجه
جالس مع الفيس بوك
وسكاي مع الواتساب
أهلك بسرعه خدوك
ساكن في غرفه يدوب
فيها الخطا مترين
أدوار على أدوار
ساكن معاه عشرين
محسود من اللي هناك
عادد عليه ملايين
لو ينكشف له الغيب
يبكي بدمع العين
واللي معاه الأهل
تلقاه في صورة كهل
إقامات وراها طلبات
ظهره اتحنى من التُّقلْ
مهموم من البيانات
وافد فزيدوا الحِمْل
فالغربه مش فسحه
يا اهل الحرم والحِلّ
الغربه هات أو هات
شيّال لحدّ ما مات
عطف الأبوه اتمحى
من كثرة الغيابات
والزوجة مترمّله
إلا شهور و ساعات
يبني الشقق والفلل
ويسيبها كالخرابات
الغربه همّ وأسى
تركب شفر أو حوت
رحله سفر بتفوت
آخرتها موت وسكوت
بقلم الشاعر/ عبدالعزيز المنسوب