بصي يامّه

حبيت أقولك وانتي عايشه
إنّي بدعي ربّنا يطوّل في عمرك
بصي يامّه
متزعليش لو قولتلك
أكون سعيد لو يومي يبقى قبل منّك
أصل يامّه الموت الحقيقي
مُش في الرحيل
دا في حاجه تانيه
الموت الحقيقي
في بُعدك عن مكاني
عن حياتي نُص ثانيه
وعارفه كمان
أنا بدعي ربّنا يوم رحيلي متحزنيش
ولو بكيتي
ابكي يوم .. اتنين
ثلاثه بالكتير وبعدها متكمّليش
يا أمي أكتر من كده
في تربتي هحس إني بجد ميت
ولو يجي يوم العيد متعيديش
صدّقيني أنا مُش هعيد
لكن تعالي وسلّمي
وازرعي ابتسامتك جنب قبري
ساعتها نور دوعاكي وضحكتك
يتسرسبوا يشكلوا جنتي في قبري
وكل ذنوبي .. دعوتك تمحيها
وذكريات دنيتي حكويكي تحيها
وحتى الولاد أولادي
قلبك أحن عليهم منّي
وان كان على زوجتي
هتسامحني وربّما تفهمني
خلّي بالك من أبويا
ومن علاجه وفرّحيه
وان شوفتي دمعه
سكتيه .. امسحيه .. طيبيه
هو مين بَعدك يا أمي يخاف عليه ؟
ما انتي عارفه انتي وحدك دنيته ونور عنيه
وخلّي بالك من البنات والشباب إخواتي
همّا أغلى عندي يامّه من حياتي
وسامحي طيش أخويا الصغير
هو يمكن لسّه خايب
بس هوَّ قلبه طيب
وعمر حُبّه ما كنش غايب
هو نِفسه يبقى حاجه
هو عايز يبقى حر
الواد صغير رغم سنُّه
مر يامّه بألف مر
وخلّي بالك سمسمه
أصيله طاهره حنينه
لو هترفض تجوّزيها جوّزيها
غصب عنها فرّحيها
واعرفي وعرّفيها .. إن يامّه وصيتي
بايدك انتي تزوّقيها
وأوعدك لا هوحشك
ولا حتى يامّه هتوحشيني
كل ساعه هكلّمك
وكمان هشوفك وتشوفيني
وان حد مره زعلك
ابعتي وعرَّفيني
وان فرحوكي
برضه ابقي طمنيني
والله يامّه حياتك أهم كتير من حياتي
انتي شجره فروعها ضل
لحياة أبويا وأولادي واخواتي
وأقولك كمان وبصراحه
قبولك للحياه تضحيه
والله يامّه بتكلم بجد
مش مجرد ترضيه
صدّقيني ابنك أناني
كل غرضه يتهنا
بعد رحيله تدعيله
بدعاكي يضمن الجنه
وان كان على الحياه جربتها
طولها زي عرضها
والفرق بسيط جداً
بين هينتهي وانتهى
فا متزعليش لمّا أسبقك
كلنا ماشيين
لكن تسبقيني
أعيش عمري في أنين
أتخبط جوّه السنين
وأنيني يبقى منك
بالذمه دا يرضيكي
يا سقياني الهنا طول عمرك
بصي يامّه
حبيت أقولك وانتي عايشه
إنّي بدعي ربّنا يطوّل في عمرك
بصي يامّه
متزعليش لو قولتلك
أكون سعيد لو يومي يبقى قبل منّك