خواطر X خواطر (البعض ليه زعلان قوى ) للأستاذ/ رفعت محفوظ

إخصى عليكى يادى الوشوش
طول عمركم ما بتختشوش
وطبعكم طبع الوحوش
والهدم عندكوا له سند
دايما أهل الهدم والدمار يبحثون عن حجج و مبررات لتبنيهم لأسلوب الهدم والتخريب وصاحب الخاطرة الشعرية أستاذ متمرس فى الشعر العامى ،وله باع طويل فى ذلك ،فهو ينتقدهم ويعلن استياءه ممن هدموا وخربوا مصر العربية الأبية الحرة بعد ثورة هى الفريدة من نوعها فى العالم .طبعا أستاذ/ رفعت هم وحوش ومبيختشوش وألف ألف مليون إخصى عليهم وعلى اللى وراهم ، وهم ملعونون فى كل كتاب لا لشىء إلا لأنهم مفسدون فى الأرض ، والله لا يحب الفساد ولا المفسدين .
*****
قلتم بلاه الدكتاتور
وحكم ظالم كلّه جور
وإختاروا ناسكم للعبور
وكمان رئيس يدير البلد
أيوه حصل قالوا الكلام ده ، و اتنحى الدكتاتور وشلته اللى خربوا مصر 30 سنة وانتهى عصر الظلم منبقاش إحنا بقى الظالمين ونبدل الظلم بظلم تانى ونحرق قلب الوطن ؟ ازاى كنا للظلم كارهين وللتاريخ حارقين وفى الوطن مولعين ؟ لو فضلنا مفسدين ربنا هيولى علينا حاكم فاسد ،يظلمنا أكثر من اللى قبله.
سمعنا وعملنا انتخاب
والشعب أعطانا الجواب
من غير رشاوى ولا إرتياب
لأجل الصبية والولد
*****
فعلا بدأت الانتخابات وبدأ أعداء مصر من جديد تخريب البلد ،مش عاوزين انتخابات ولا أمن ولا استقرار أصلهم باعوا الوطن بشوية فلوس ، باعوا بلدهم وأصلهم ودمهم وكرامتهم ، لكن برضه نجحت مصر وانهزموا اللى مبيختشوش ،اخصى على اللى مبيشفوش .
دلوقتى ليه بقى زعلانين
بعد نجاح ناس مؤمنين
واللا إنتوا لأمريكا عابدين
وهى المعين ليكوا والسند
تخيل إنهم قال أيه زعلانين !! يروحوا من البحر ويشربوا خلاص الشعب قال كلمته ، نعم سيدى لا يزالون يتغنون بأغنية "ماما أمريكا " وطبعا يكرهوا كل ما هو إسلامى ،ومش عاوزين غير رأى الأمريكان أما أبناء الوطن المخلصين بقوا ممنوعين من الكلام وحتى لو اتكلموا محدش بيسمعهم فى ظل إعلام لسه فيه مفسدين بيضللونا .
إصحوا بقى يا أهل البلد
أعاديكوا كتر بدون عدد
جايين لكم وبغِلّهم
شايلين معاول للهدد
أيوه الأعادى كتير ومتنوعين فى لبسهم ولهجتهم لكن متوحدين فى كراهيتهم لمصر و حقدهم عليها .بس إحنا مش هنفضل نعسانين ،والبلد بتتحرق وبتتسرق ، لازم نفوق لازم نبقى فوق فوق العصبية فوق الخلاف فوق الأشخاص وتحت أمرك يا مصر .
أستاذ/ لرفعت محفوظ باقة من الشكر والتقدير سيدى نضعها بين يديك على أن منحتنا فرصة التعايش مع خاطرتك بخواطرنا المتواضعة بجانب إبداعاتكم المتألقة .