قالولى رشح نفسك قلت لهم

كراسيكم ماتلزمنيش
وهيه كمان ما تنفعنيش
ومالها القعده ياعنيه
على السجاده أفرد فيها رجليه
وقدامى وسع وبراح
وأصلّى فرضى بإطمئنان
وأنا مرتاح
وقدامى الولاد قاعدين
على الطبلية متحاوطين
ودكر البط
متحمر
فى صحن كبير
ومدور
ساعتها أشمر أكمامى
وأبسمل للى أعطانى
نقوم بالأكل على آخره
ونحمد ربى على نعمه
وأتمدد وأنا مكانى
وأنام مرتاح بدون كوابيس
كراسيكم ياناس ديه ماتلزمنيش
....
أنا طول عمرى مش مغرور
ولا بأحلم بكرسى قصور
ولا حتى بكرسى سرور
كفاية عليّه إنى غفير
قاعد فى أرضى ليل ونهار
بأحرسها من الشطار
وكل خسيس يحوم ع الدار
عاوز يسرق
فى قوت ولدى
وينهب أرضى مع بلدى
يلاقينى واقف زنهار
وأنا ياناس وبالبلدى
بأقول أشعار مع تحابيش
كراسيكم ياناس ديه ماتنفعنيش
...
ومالها القعده فى الغيطان
قاعد مرتاح لابس قفطان
وجنبى قلة مليانة
يكركر منها العطشان
وراكية نار .. عليها براد
وزردة شاى للسهران
وناى بصوابعك الحلوة
يقول أنغام
تسللى القعده ..تبقى تمام
وتسمع شقشقة عصافير
ترد عليك
وقمرة حلوة فى العالى
تناجى عنيك
تقول لك ياحبيب الروح
إوعى تروح
ومن قربك ما تحرمنيش
كراسيكم ياناس ديه ما تلزمنيش