نانا الحيرانه - وحمار فرشوطى

كتب - فرشوطى محمد - كلن بدو نانا ونانا حيرانة --- يانهارك مش فايت ياحمار انت صابح تغنى اغانى هابطه على الصبح ؟
قال الحمار : ياعم فرشوطى انا حر أغنى هابط ارقص انا حر - الآن جاء وقت حسم المعركة بالجماهير وبالقبائل وبالزحف بدون سلاح على الجبل الغربي ومصراتة وبنغازي لتطهيرها من الخونة والعملاء.
قلت : الخطوط عندك بقت زى خطوط المحمول كله بيدخل على كله - من نانا الحيرانه بتاع سوريا للقذافى حته واحدة ؟
قال الحمار : وايه الفرق - كله بدو نانا - ونانا حيرانه - وتعبانه - يافرشوطى افندى ايه الفرق بين نانا وبين القذافى -؟ اسمع بيقول ايه تانى- : لسنا بحاجة للسلاح.. مليون ليبي سيزحفون على الجبل الغربي لتطهيره بدون سلاح ومليون سيزحف على مصراتة لتطهيرها بدون سلاح ومليون سيزحف على بنغازي لتحريرها من الخونة.
قلت - كلام جميل - الزحف المقدس دا موجود فى كل الاديان - وكمان السلحفاة بتزحف -
قال الحمار : جميل قوي - ماهى الملايين عنده بالزوفه -طيب افرض زحفوا وطلعوا الجبل ولقوا نانا هناك حايعملوا أيه ؟
قلت : حايرقصوا ويغنوا معاها زي الزعيم ما طلب منهم.
قال الحمار : ويسيبوا الزعيم لواحده ؟
قلت : وأيه المشكله - هما الزعماء بتوعنا بيخافوا - دول ابطال - واشاوس - دا حتى بيكرهوا الكرسي - ومحدش منهم لافى يأكل - وبيحاربوا المخمورين والمرتزقة والارهابيين - وبينزلوا الاسواق -وبيركبوا عجل صينى - وبيشربوا ميه من الترعة - عمرك شفت زعيم منهم قتل اى واحد من المعارضه؟
قال الحمار : منهم لا - ولا عمري شفت واحد منهم رفع ايده على اى فرد من شعبه - دا حتى بيقولوا لو الشعب مش عايزنا احنا ممكن نسيب الكرسي ونمشي- دا حتى واحد منهم ولعوا فيه وهو مش قاعد على الكرسي - والتانى - الشعب ساب البلد له حبا فيه وراح قعد فى تركيا- فعلا يا استاذ فرشوطى احنا مش عارفين قيمة الحكام العرب خالص.
وقبل ان يتركنى الحمار ويذهب لكى يعمل لآنه يؤمن بأن العمل افضل شيء فى الحياة وانه اى العمل هو اساس الحياة قال :المصيبة ان كله بدو نانا ونانا حيرانه مش عارفه تصرف ازاى؟
----
صفحة الكاتب على الفيسبوك
http://www.facebook.com/farshoutye