الظلم أية معناه

الظلم إيه معناه
قولولي أحسن بتوه
الظلم أن الأخ
يقتل يوم أخوة
والابن
يسرق غبن
وميعرفش ابوة
الظلم إن العدل يآكل
في الحقوق
ولا أن صمتك
يملي جوفك
والمرار يكسي الحلوق
ولا أن يزعق
صوت ضميرك
ميلاقيش إلا الشقوق
مالية الوجوه
الظلم إيه معناه قولولي أحسن بتوه
الظلم انك
كل يوم
تقتل طموح
تاخد عزاه
وتمشي في جنازته
بصراخ وبكي ونوح
وانك تبيع الروح
وقدمك سبيل
تزرع في قلب الليل
ييجي مليون نهار
فوق الجروح
الظلم لما
تشوف صغار
مش لاقية قوت
وسط الحصار
شلال بشر تنزف تموت
وناس تطوف
حوالين صنم اسمه السكوت
بيخلدوه ويعبدوه
الظلم إيه معناه قولولي أحسن بتوه
الظلم ان الشوك
يدوس علي كل ورد
وأن النفوس
تنهب وتأذي كل يوم
تاكل في بعض
والحق مات م البرد
طاير في السما
مش لاقي ارض
والعرض
شغال
وسط مسرح
الابتذال
والحلم ملوف بالحبال
كل يوم بيكتفوه
الظلم إيه معناه قولولي أحسن بتوه
الظلم فين ما يكون
رخيص
ومالوش تمن
الظلم للأباليس
حياة حرة وطن
الظلم لابس جلدنا
له كام زمن
زي السواد بين العيون
ميت ألف
صنف وألف لون
يا ناس يا هوه
الظلم ايه
الظلم ليه
الظلم ده
ملعون أبوه
----------------
رابط القصيدة على اليوتيوب
http://www.youtube.com/watch?v=Ivq64O-itYk
----------------
ايميل الشاعر
mabouzeid87@yahoo.com