ما بعد الثورة

مابعد الثورة
بعد الثورة مابقتش متابع السياسه
لان كله اتفرق فضاعت منى الحماسه
وناس كتير اوى بقت زى محتاسه
نختار مين من المرشحين للرياسه؟
كل واحد فيهم متعلم و بيتكلم بكياسه
خلصونا يا جيش احنا بنطلب استغاثه
قرروا الاول الانتخابات ولا الدستور؟
متقعدوش ساكتين و بلاش فتور
انتوا حتبقوا السبب لو الشعب بدا يثور
وليه محاكمتوش الحراميه من شهور؟
وليه ساكتين على البلطجه و الفجور؟
لازم تقطعوا ايدى المعتدين بالساطور
اتحركوا محتاجين نعيش فى سرور
احنا مع الشرطه و حنقف جنبهم بالطابور
ونرفعهم وندلعهم و نريقهم بالبخور
بس حسيسونا بقى بالامان
والضباط يشتغلوا زى زمان
ويبقوا رجاله مش منظر و دخان
انا خايف نبقى زى السودان
وننقسم بسبب احزاب او اديان
ونتحول فى عيون عدونا لجرذان
ويبقى انتصر علينا العدوان
لكن عمرنا ما حنبفى فى النسيان
احنا فى الشده بنتحول لسوبر مان
وبنهزم المفترى و بنحوله لجبان
ومابنخافشى من قوة اى سلطان
واسالوا علينا التاريخ و الزمان
اسالوا الارض وابحثوا فى كل مكان
حتلاقوا ان المصرى ده اعظم انسان
انجزوا يا جيش الشعب بقى تعبان
وخدوا القرار لاعادة اصلاح البنيان
ويارب انصر مصر دايما يا حنان
كامل محمد حامد