حابب تعرف هى بتحب فيك ايه ..وأكتر حاجة ممكن تشدها ليك وتكون فى منتهى الإعجاب بيك ومستنية تبادلها نفس الشعور ، إحنا عرفنا السر .. لو عايز تعرفه أنت كمان شوف كلام البنات فى السطور الجاية أكتر حاجة ممكن تشد ياسمين أحمد على 23 سنة فى الراجل أنه يكون حنين وطيب لأن الصفتين دول لما بيكونوا فى أى راجل بيكون بجد مختلف لإنه يعامل البنت باحترام ويشعرها بأنها أميرة وملكة متوجه فى قلب حبيبها. أما ريهام حسن رشاد 28 سنة شايفة أحلى صفة فى الراجل "غلاسته" يعنى التقل ودايما يكون هو المطلوب وأنا الطالب وأجرى وراه وأول ما أحس أن الصورة أتقلبت وأصبحت أنا المطلوبة وهو الطالب .. أطنشه ! . الدم الخفيف والطيبة هما اللى شدوا مروة سمير شاهين 22 سنة فى خطيبها.. وتقول : خفة دمه كانت بشياكة يعنى مش بشكل يقل من قيمته او يخليه مادة تريقه وسط أصحابه ، ولما كان بيغيب كنا بنحس أن المكتب صامت وبايخ. وتقول خلود عبد الناصر طه 26 سنة : تحمل المسئولية هى عنوان الرجولة عندى...ده بجد الى حاسه أنه مش موجود عند كتير من الشباب دلوقتى فالولد الذى تشعر أى بنت أنه يعتمد عليه وقادر على تحمل المسئولية المفروض متسبهوش لأن الرجل اللى عنده الصفة دي الأن بقى عملة نادرة. ميهمنيش الشكل ولا المظهر قد مايلفت نظرى فى الراجل صاحب الشخصية القوية إنه يحسسنى بالأمان .. يعنى لما أكون معاه أحس أنى مش خايفة من أى حاجة فى الدنيا ومعايا حد ممكن يحارب العالم كله علشانى وده بيظهر فى حاجات كتير من سؤاله عنى وحالي فى شغلى ويومى كان إزاى ولما أجى اخرج يسألنى خارجه مع مين ورايحه فين وهترجعى أمتى .. الحاجات ديه فيه بنات بتشوفها تحكمات لكن أن شايفه أن الشخص ده بيخاف على . أما إيمان المهدى 25 سنة فأعجبها فى خطيبها أنه دائماً " صاحب موقف " فى شغله مع مديره ويحب فى الاجتماعات يناقش ويسأل إذا قال المدير شيئاً لم يقتنع به. . أما ماريان صفوت 26 سنة تشترط أن يكون كريماً لأن البخل فى الراجل ده أكتر حاجة ممكن تجنن أي بنت .. لأنها لو مخدتش بالها من ده قبل مايرتبطوا هتعيش فى "قرف" منه بعد الجواز لأنه ستكون مسئولة ، وبما أنه بخيل ممكن يستخسر يصرف عليها فى أساسيات متطلباتها .
