البطاطس بالفراخ من مطبخ ريم

أهلا بيكم النهاردة في أول حلقة من حلقات " مطبخ كلام بنات " النهاردة هنحاول نساعد كل البنات اللي مش بتعرف تطبخ
ازاي تعمل اكلات سهلة و بسيطة من خلال بنت عادية زيكم تمام اسمها ريم ، وهتقدم لنا النهاردة "صينية بطاطس بالفراخ" و للتحلية هتعلمنا طريقة "الترايفل اللذيذة" بالفراولة، و دلوقتي تعالوا نشوف المقادير و الخطوات مع ريم.
المقادير :
• 6 أو 7 حبات بطاطس حسب حجمها .
• 3 أو 4 حبات طماطم .
• بصلة كبيرة الحجم .
• 3 حبات فلفل رومي أخضر " أو ملون حسب ذوقكم "
• 3 حبات جزر .
• ملعقة زبدة أو سمنة حسب اللي انت بتحبيه .
• ملح و فلفل .
• فرخة مقطعة نصفين .
الخطوات :
• قطعى البطاطس و الطماطم و البصلة و الفلفل و الجزر لشرائح ليست سميكة علشان تستوي و لا رفيعة علشان ماتتحرقش .
• ضعي ملعقة الزبدة في الصينية و عليها كل الشرائح السابقة و بعدها ضعي الفراخ على هذه المكونات و بعدها ضعى الملح و الفلفل علي الصينية " كمان ممكن جدا تضيفي عليها التوابل اللي انت بتحبيها "
• الخطوة الثالثة ضعى الصينية على النار و لكن لا تنسي اضافة كوب و نص ماء علشان البطاطس تستوي .
• الخطوة الأخيرة لما تحسي أن البطاطس دخلت في بدأت تستوى حطيها داخل الفرن لمدة نصف ساعة لحد ما يحمر جلد الفراخ و تستوى المكونات و يمكن اضافة البقدونس للتزين.
وفى أثناء وجود " صينية البطاطس بالفراخ " في الفرن ، ما تحرميش نفسك من متعة عمل طبق حلو كمكافأة ليكي بمناسبة أول يوم دخول المطبخ، ريم هتقدم أكلة بتحبها و هي طبق "الترايفل بالفراولة "
المقادير :
• 6 قطع بسكويت شاي .
• معلقة كاستر .
• كوب لبن .
• نصف علبة جيلي .
• ملعقة سكر .
• 5 حبات فراولة مقطعة شرائح صغيرة .
• نصف كوب عصير فراولة .
الخطوات :
• كسري قطع البسكويت قطع كبيرة في طبقين صغيرين .
• حضري الكاستر من خلال تسوية ملعقة الكاستر مع كوب اللبن على النار حتي يثقل الكاسترد ثم نضعهم في الثلاجة لدقائق .
• نقوم بتحضير الجيلي من خلال وضع كوب ماء مع نصف علبة الجيلي على النار حتى تغلى المكونات و بعدها نضيف عصير الفراولة مع قطع الفراولة على الجيلي و ننتظر حتى تبرد .
• و بعدها نضع المكونات على الكاسترد و البسكويت و تضع في الثلاجة وطبعا تقدم باردة و بالهنا والشفا .