الصحه تاج علي رؤس الاصحاء لايراه إلا المرضي .. نفس المعني هو ما يشعر به الإسكندرانية عندما يقرروا بإرادتهم او تفرض عليهم الظروف إنهم يعيشوا بره مدينتهم .. والمشكلة إنك طول ما أنت عايش فيها مش بتحس بقيمتها وبتزهق منها .. لكن لو خرجت منها ليوم واحد صعب تعيس فى أي مكان تانى .. والإسكندريه بالنسبه للمصيفين هي شارع خالد بن الوليد والمنتزه وميامي ويمكن يعرفوا يروحوا محطه الرمل لكن بالنسبه للإسكندرانية.... هي الأنفوشي والسياله واكله سمك مفيش زيها عند حوده دونجل .. وكمان المكس وأبوقير وباكوس العاصمه ودي منطقه في قلب إسكندريه بنعتبرها العاصمه .. فيها اللي انت عاوزه كله من الإبره للصاروخ وبسعر مش هتلاقيه في أي منطقه تانية .. ولأن الإسكندرانية طبعا " مودهم " دايماً مختلف وعلي طول متقلبين ويمكن يتعصبوا من أقل حاجه .. بس بيهدوا في لحظات ، وانا اكتشفت ان الموضوع ده له علاقه بالبحر .. لاننا زي البحر ممكن يثور في لحظه ويهدي في اللحظة اللي بعدها ، وإحنا بنعشقها في الشتاء لانها بتكون اجمل من الصيف بمراحل وده اللي مش أي حد يفهمه غيرنا لأن النوة بتجيب معاها الخير والمطرة والفرحه ورزق الصيادين المهددين بالانقراض للأسف .. فهذه المهنه رغم أهميتها لكنها متعبة جداً وكمان دخلها مبقاش مجزي زي زمان .. وكمان منع الصيد 3 شهور في السنه أصبح أزمه في حياه كل الإسكندرانية لان الصيد بيقل والسمك بيغلي ومفيش بيت في إسكندريه مبيدخلوش السمك ولو يوم واحد في الإسبوع ...دي أكله مقدسه عندنا وملهاش بديل ! اما عن الخروجات فالكلام كبير .. البحر هو ملاذنا بس مش البحر بتاع المصيفيين في ميامي وسيدي بشر والمندرة .. لا .. إحنا بنحب نروح الشاطبي خاصه انها جنب المكتبه ومجمع الكليات النظريه في الإسكندرية ، صحيح إسكندريه ماريا ...وترابها زعفران ، و فيه حاجه تانيه مهمه وهي لغتنا واللي بالنسبة لنا شعار وهويه .. بس بصراحه لما بنشوف المسلسلات اللي بتجيب الاسكندرانيه بحس انها " over " قوي ، صحيح لنا طريقة معينة وبعض الكلمات الغريبه بس مش طول الوقت .. يعني احنا مثلا بنقولوا علي الميكروباص " مشروع " وكل الكلام عندنا بالجمع يعني نقولوا ونقعدوا وننزلوا ونشربوا .. دي حاجات مقدرتش اتخلص منها ، وكمان بنقول علي الطعيمه " فلافل " .. لهجتنا كده إحنا كده ، أما عن الجدعنه فحدث ولا حرج .. اجدع ناس بجد - مش عشان انا منهم - بس الإسكندرانية لازم يشاركوا اي حد في مشكلته ، يعني لما تلاقي حادثه في القاهره وواحده واقفه " بترقع بالصوت " من غير ما يبقي ليها حد في الحادثه .. اعرف إن ليها أصل إسكندراني !! .