أسمع .. وبعدها أسأل نفسك : متى قلت " ياريتني ما أتكلمت " ؟

زمان قالوا "من لا يملك لسانه يندم" و"إن كان الكلام من فضة فالسكوت من ذهب"، والحقيقة أن مواقف كتير تقابلنا في الحياة نندم إننا تلكمنا فيها، لكن الندم بعد اية بقي؟، ولذلك لابد وأن نفكر في الكلام قبلما نتفوه به ..
ويقول سامح جابر، طالب بكلية الإعلام جامعة القاهرة، "أنا عندي مواقف كتير؛ بس أكثرهم ندما لما بتكلم مع حد في موضوع شخصي أو سري ويروح يخرجه بره لحد تاني بعد ما وثقت فيه". ويقول أحمد ياسر، طالب بكلية الآداب جامعة القاهرة، "بنندم كتير وخصوصا لما يبقى الكلام مش بيجيب نتيجة، مرة كنت بتكلم عن فكرة التسويق الشبكى وإنها حرام شرعا لكن اتفاجئت إن اللي بقوله كدا دخل معايا في صراع عن الموضوع من قبل ما يسمع رأيي فطبعا ندمت أنى اتكلمت أصلا". بينما يشير بلال الصاوي، طالب بكلية الحقوق جامعة القاهرة، " فيه موقف صراحة مع أحد الفنانين بدون ذكر أسماء وندمت إني صرحته وجرحته وقلتله إنك مش فنان ولا عندك صوت أصلا".
ويوضح أحمد حسام، طالب بكلية الطب جامعة المنوفية، مواقف كان قصدي أهزر فيها مع أصحابي بس أخدوها بشكل إهانة ليهم". بينما تؤكد مي أنور، طالبة بكلية الآداب جامعة بنها، "الموقف اللى أندم فيه لما أدخل في حاجة متخصنيش، والموقف دا اتكرر معايا كذا مرة، وفي مرة كان في حوار بين زميلتين ليا واتدخلت فيه وقالولى وقتها أنتي أية اللي داخلك في الموضوع وندمت كتير إني ادخلت ومن وقتها وأنا مش بدخل في أي حاجة متخصنيش أبدا". وتقول رحمة إكرامي، خريجة كلية التجارة جامعة القاهرة، "كان في اتنين من أصحابي متخاصمين وحاولت أصلح بينهم بس هما ردوا عليا رد وحش فندمت إني اتكلمت معاهم".
ويشير أحمد ياسر، طالب بكلية الطب جامعة المنوفية، "كان في خناقة في يوم بين جاري وأخوه وأدخلت فيها وحاولت أصلح بينهم وأهديهم بكلمتين لكن جاري قالي أنت مالك واية اللي دخلك أصلا، وأنا ندمت إني أدخلت واتكلمت". ويقول محمد حسيني، خريج كلية الصيدلة جامعة طنطا، "أفتكر وأنا صغير أخواتي كسروا أطباق في المطبخ، المهم أول ما بابا جه من الشغل قولت له على اللي حصل واللي عملوه أخواتي وعلى شقاوتهم، فقام بابا ضربهم وأخواتي زعلوا مني ومكلمونيش لمدة شهر كامل، وأنا بعدها ندمت كتير إني قولت لبابا على اللي حصل".
وتوضح أيات عبد الرحمن، طالبة بكلية الحقوق جامعة القاهرة، "قولت سر لواحدة كانت أعز صحباتي وطلعت السر دا برا، وكان قصدها توقع وتخلق مشاكل بيني وبين صديقة ليا تانية، وأنا بعد الموقف دا اتخانقت معاها وخاصمتها ولحد دلوقتي مبكلمهاش وندمت إني قولتلها من البداية أسرار ومكنتش أعرف إنها لا تؤتمن على سر بس التجارب بتعلم الواحد". وتقول نرمين سيد، طالبة بكلية دار العلوم جامعة القاهرة، "عاتبت حد وكان رد فعله مش كويس معايا وقتها وندمت إني عاتبته من البداية وماكنش لازم أعمل كدا، بس أرجع وأقول إن الواحد مش بيتعلم ببلاش والحياة تجارب". ويؤكد عبد الدايم سامي، طالب بكلية التجارة جامعة بنها، "أتكلمت مع حد من قلبي وقلتله تفاصيل حياتي وندمت بعدها لأنه فضحني في كل مكان". ويشير اريك قزمان، طالب بكلية الإعلام جامعة القاهرة، "مرة قولت لواحدة معجب بيكي وخسرتها وندمت كتير اني اتكلمت"