لسه بحبها !

السلام عليكم أسره بص وبطل ….
أنا كنت بدور ف الفتره دى على حد ممكن احكيله على مشاكلى كامله ومن غير ما أخاف والحمد لله بمنتهى الصدفه لقيتكم بصراحة أنا مش عارف أتكلم أقول غيه وعلشان كدا أنا هحكى من غير أي مقدمات ….
حكايتى بدأت من يوم ما اتولدت اتولدت ف ظل ظروف ماديه كويسه بس والدى كان عنيف جدا معايا زى اى بيت يعنى كنت اغلط وامى لو الغلطه صغيره تسكت عليها ولو كبيره تقول لبابايا علشان يضربنى المشكله انى ف الفتره دى وهى فتره ابتدائى كانت دماغى شغاله جدا والحمد لله كنت متفوق بس كانت دماغى شغاله كمان ف الامور الاجتماعيه يعنى كنت كل ما والدى يضربنى افكر هو ليه بيعمل كدا هو مش عارف ان كدا غلط المهم كنت بطرح على عقلى امور اكبر من سنى بكتييير جدا وعدت الايام وانا ف 4 ابتدائى حبيت بنت اسمها ريهام كان والدها ووالدتها مطلقين انا عارف ان ممكن كلكم تقولو ان دا حب طفوله بس انا كان بالنسبه لى حاجه اكبر من كدا كان بالنسبالى كل حاجه ف ظل انى مش لاقى حب ف البيت او ف اى مكان تانى فاكنت هى كل حاجه كل الحب اللى كان متمثل ف حياتى كان متوجه لريهام وبرضه علشان ما اطولش عليكوا فتره وسيببنا بعض ودا عملى شرخ كبير جدا جدا جدا وبدأت فتره اعدادى وانا ف حاله من الحزن ما تتوصفش ودا خلانى اندمج ف عالم الانترنت بطريقه مريبه يعنى كنت 24 ساعه قدام الجهاز بتعرف على دا واصاحب دا واكذب على دا واحكى لدا كان دا كل اللى بعمله وطبعا علاقتى مع والدى بتسوء اكتر فاكتر لانه عمره ما عرف انا بمر بايه ولا حاسس بايه ولما وصلت مشاكلى مع والدى مرحله انى اتطرد من البيت او انى اسيب البيت وامشى قررت انى ابعد عنه احنا مقيمين ف القاهره وكان لينا بيت ف المنصوره فاقترحت انى اروح المنصوره ف مرحله الثانويه على اساس انى هناك مفيش وسايل لتضيع الوقت والجو هادى والحاجات دى انما السبب الحقيقى اللى محدش كان يعرفه غير خالى انى عاوز ابعد عن ابى واول ما وصلت المنصوره وبعديها تقريبا بشهر شوفتها لاول مره ومقدرتش انزل عينى من عليها ومقدرتش اخبى برضه عليها امل حبيبتى روحت وقولتلها انا بحبك من غير اى مقدمات لانى فعلا كنت بعشقها مش عارف ازاى ولا ليه هو كد….
واول ما قولتها كدا وتانى يوم قالتلى انا كمان بحبك روحت لامى وقولتلها انا بحب فلانه وعاوز اخطبها ف اقرب وقت وطبعا بتكون المساومه خلاص ذاكر ف الثانويه وادخل كليه محترمه واحنا نخطبهالك …
المهم انى عرفت عيلتى كلها علشان ما احسش انى عملت حاجه غلط وطلبت منها تعرف عيلتها هى كمان وعرفت اختها وطلبت انها تعرف مامتها بس كانت دى مشكله المهم انه مع الوقت والسنين بدا يتقدم لامل عرسان لحد ما جه اليوم اللى ماكنتش هتعرف تفلت فيه فقالت لمامتها انا بحب احمد ومش هتخطب لحد غيره وطبعا اتضربت واتهزقت بس برضه فضلت بتحب احمد ….
لحد ما ظهرت زميلتى اسماء كانت بنت معانا ف المدرسه عمرى ما فكرت فيها ف اكتر من صديقه ابدا دايما كنت شايفها اختى كانت بتيجى دايما تحكيلى على مشاكلها وانا احاول احلهالها وكانت عارفه انى بعشق حاجه اسمها امل وامل كانت ضد علاقتى دى مع اسماء فكنت بلبى رغباتها وببعد عنها انما كانت اسماء تفضل ورايا مثلا عندها مشكله عاوزه تتكلم مع حد وهى مبتثقش ف حد غيرى …
فكنت اكلمها وترجع امل تزعل وكانت دايما دى اول الخلافات وفى يوم واحد جه قالى ان امل كلمت واحد وقابلته وانا اعرف الواحد دا اتصلت على امل وسالتها عيطت وقالتلى حصل بس كنت عاوزه اعرف انتا بتعمل ايه مع اسماء فقولت اما اجرب اكلم واحد زى مانتا بتكلمها وعياط صدقتها لانى عارف ان عندها العند اللى بيولد الكفر ومرت الايام ودخلنا الجامعه وامل كانت كل يوم بتبعد عن اليوم اللى قبله بقيت كل يوم بسمع عنها انها مع واحد بس الحمد لله لما اتاكد من الخبر الاقى نصه صح ونصه غلط المهم انى بعد دا كله انا لسه بحب امل دى جدا جدا جدا جدا جدا جدا وماقدرش ومش قادر اتخلى عنها بعشقها اعمل ايه ؟؟؟؟؟؟
صديقنا العزيز
واضح إن المشكلة اللى انت بتعانى منها مشكله ثقه، إن حبيبتك مش واثقه فيك خاصة لما بتلاقيك دائم الاهتمام بصديقتك أسماء ، من وجهه نظرى إن حبيبتك بتحاول إنها تثبت ليك أنها تقدر تكمل حياتها من غيرك وإنك زى ما بتعمل وبتهتم بغيرها هى كمان سهل جدًا أنها تلاقى غيرك , اللى اتكسر بنكم ولازم يتصلح هو الثقه ،واعادة بناء الثقه مش بالكلام ولكن بالافعال حاول إنك تثبتلها انك بتحبها هى وبس علشان متضعش منك للأبد.