"نشكركم على حسن تعاونكم معنا".. بتفكر فيها إزاى لما حد يقولهالك؟

شباب: لازم نتشكر علي أفعالنا مش مهم الكلمة المهم تكون بابتسامة ومن القلب
شباب: مابحبش شكرا علشان بتحرج.. وآخرون: هو أنا عملت المستحيل عشان تشكرني؟
شكرا وميرسي، وكلمات تانية كتير بتعبر عن شكر وامتنان الناس للي بيقدمولهم أي خدمة أو مساعدة، في ناس كتير بتحب تتشكر من الأشخاص اللي قدمولهم مساعدة في حاجة معينة وناس تانية مش بتحب تتشكر، وبتكون خجولة لما بتسمع شكرا من حد، في ناس بتحب إنها تعمل الخير وترميه في البحر زى ما بيقولوا، وناس تحب تحس بإنجازها؛ كل واحد فينا بيختلف في أية اللي يرضيه في الشكر؟
فتقول نرمين سيد، طالبة بكلية دار العلوم جامعة القاهرة، "بحب الشكر لما يكون مفيهوش مبالغة بصراحة ولما يكون من القلب، وبتحرج يعني بحس إني معملتش حاجة كبيرة علشان الشكر دا كله وكدا يعني". ويرى عمرو حسن، خريج معهد فني تجاري ببنها، "مش بحب أسمع كلمة شكر أو امتنان من حد، أحبهم دايما يشكروني بأنهم ميقولوش حاجة أصلا وبحس بخجل صراحة لما بتشكر".
وتشير تغريد ممدوح، طالبة بكلية الإعلام جامعة القاهرة، "أنا بحب أتشكر من الناس بس يكون اللي أنا عملته فعلا يستاهل الشكر ده، بس في النهاية كل واحد وطريقته حد بيحب يبالغ في الشكر وحد شكرا كفاية وبحس بسعادة بجد لما تقدم حاجة لحد وتكون فادته فيشكرك عليها وهو حاسس بالفرحة، والحقيقة المفروض أنا اللي أشكره يعني لأنه إداني فرصة إني أكون من الناس اللي الحديث الشريف قال عنهم، "إن الله في عون العبد ما كان العبد في عون أخيه". ويؤكد سامح أحمد، طالب بكلية الفنون التطبيقية جامعة بنها، "أنا واحد من الناس مش بحب إني أتشكر خالص".
ويقول أحمد زكريا، مهندس زراعي، "مش بتحب أتشكر لكن لو كلمة شكرا لوحدها بتبقى كفاية جدا عليا وبيبقى الواحد مبسوط جدا إنه قدم حاجة لأي حد بصرف النظر لو كانت حاجة كبيرة أو صغيرة". وتوضح نجوى خالد، طالبة بكلية الإعلام جامعة 6 أكتوبر، "بحب طبعا أتشكر من الناس مين فينا ميحبش الشكر، وبحس بالتقدير وإني عملت حاجة كويسة في حق الشخص اللي بيشكرني". وتشير هبة رأفت، طالبة بكلية الآداب جامعة عين شمس، "بحب الناس تشكرني كتير وبابتسامة ولما بتشكر بحس وقتها إني فعلا عملت حاجة تستحق الشكر". ويرى بلال الصاوي، طالب بكلية الحقوق جامعة القاهرة، "أنا من النوع اللي مش بيحب الشكر أصلا لأن أنا بعمل الحاجة والأجر والثواب عند ربنا، ودا أعظم أجر طبعا وبحس إني مش مبسوط لما بتشكر".
ويؤكد أحمد حسين، طالب بكلية الإعلام جامعة القاهرة، "مش بحب الناس تشكرني، بس بحب الناس تكون مبسوطة عن طريق حاجة كويسة عملتها". وتقول هدير محمد، طالبة بكلية الصيدلة جامعة القاهرة، "مش بحب أسمع كلمة شكر من حد أساسا ولما بسمعها من حد بزعل لأني بحس إن ثوابها في الدنيا بس، أنا عايزة الثواب في الأخرة". وتقول ميادة شاكر، طالبة بكلية الإعلام جامعة القاهرة، "مش بحب حد يشكرني أصله هيشكرني ليه أنا معملتش معجزة يعني أيًا كانت الحاجة اللي عملتها". وتوضح أمنية ياسر، طالبة بكلية الحقوق جامعة عين شمس، "أي كلمة تعبر بيها بس تكون من جواك بجد". ويؤكد محمد فوزي، طالب بكلية التجارة جامعة بنها، "الشكر لله طبعا بس أنا عن نفسي مش بحب الناس تشكرني خالص بصراحة أنا معملتش مستحيل يعني علشان أتشكر".