بعد ما كنا "كلنا خالد سعيد".. بقينا "كلنا مينا دانيال"!

على طريقة "كلنا خالد سعيد".. قام عدد من الأقباط أمس بعمل صفحة على الفيس بوك لمينا دانيال وهو شاب عنده 25 سنة وكان ضحية من ضحايا أحداث ماسبيرو.. وأطلقوا على الصفحة اسم" كلنا مينا دانيال".. وفي خلال ساعات قليلة أصبح عدد أعضاؤها أكثر من 3 ألاف عضو..
وقامت الصفحة بتعريف مينا دانيال بالقول" هو شاب مصري وبس.. شاب من خيرة شبابنا"، وكان مينا ناشط سياسى فى حركة شباب من أجل العدالة والحرية، وكان لديه أحلام بأن تكون بلده أحسن، وشارك في ثورة 25 يناير، وشارك فى معظم الوقفات والمظاهرات والاحتجاجات، وكان يطالب بالحرية والعدالة الاجتماعية والمساواة، وشارك مينا في أحداث ماسبيرو من اجل مطالب مشروعة، وتساءلت الصفحة ما الذى حدث ما الذى جعل المظاهرة السلمية تتحول إلى أعمال شغب وقتل ودمار وخراب وفي النهاية استشهاد مينا؟!.. من المستفيد من هذا؟!، واختتمت التعريف به بالقول: مينا هنيئا لك وسوف تظل دائما بقلوبنا ولن نترك دمائك تروح هدرا.. وداعا مينا.
وأكد القائمون على الصفحة بأن هذه الصفحة لكل المصريين، كما قالوا أنه "علشان دمك ودم كل مصري الثورة مستمرة غصب عن أي حد"، وأكدوا أنه لن يسمح لأحد باستخدام ألفاظ خارجة في التعليقات، وقاموا بتحميل صورة لجثة مينا وقارنوها بصورة جثة جيفارا، وأكدوا أنهم شبه بعض.
وعلى طريقة "كلنا خالد سعيد" أيضا قام القائمون بكتابة بعض الآراء والأخبار التي تتعلق بما حدث وجذب الأعضاء لكتابة تعليقاتهم، مثل: مامته قاعده تكلمه .. قاعدة تتكلم عنه .. عن نزولاته المظاهرات ونضاله .. مامته هدومها غرقانه بدمه .. وخدها نشف عليه دمه .. دم الشهيد .. مينا دانيال .. مينا صاحبنا .. أنا بجد مش قادر أصدق أو استوعب .. حرااااااااااااام بجد.
- سؤال بسيط ومن حقى وحقك وحقك الشهداء مصر كلهم فى قضية قتل المتظاهرين خلاف مين أعطى الامر للضرب وكل واحد يرمى على التانى دلوقتى مين اعطى الامر للضرب مين بقى جاوبونى انا مينا وانا محمد وانا "وائل ميخائيل، وسامى فتحى، وجرجس راضى، وميشيل جرجس، وأسامة فتحى عزيز، وأيمن فؤاد أيمن، ومايكل مسعد جرجس، وأيمن صابر بشاى، وناجى نبيل كمال، وأيمن نصيف وهبة، وصبحى جمال نصيف، وأيمن صابر بشاى، وهادى فؤاد عطية، وشحات ثابت معوض، ووائل خليل ميخائيل، وكمال فايق وهيب. حد عنده رد
- والدة دانيال منهارة وبتقول هاتفضلي عطشانة للدم يامصر .. امتى تشبعي من دم ولادك يا مصر.
- مينا بعد مانضرب بالرصاص اتسحلت جثته لحد ما جلد ضهره كله اتسلخ .. بجد حرام .
- لسانى عاجز عن الكلام بس هقول حاجة واحدة بنحبك يا مصر
- تقرير الطب الشرعي ورد به ان سبب القتل شجار أهالي . هى وصلت لكده كمان حسبنا الله ونعمه الوكيل.
أما عن التعليقات التي جاءت على الصفحة فكانت كلها تحمل عبارات الأسى والحزن على مينا، مثل: ربنا يصبر أهله و يكتبه شهيد عنده، الله يرحمك يا مينا وينتقم من اللي قتلوك، مينا شهيد كل المصريين، هاتوشحنا يا مينا، الله يرحمك يامينا انا صحيح ماعرفكش بس اللى مكتوب يخلى أى حد يتمنى انه يكون كان عرفك، أنا مصري مسلم يعني أخوك وبتمنى ربنا يغفر لك.
ولم تخل الصفحة من بعض الآراء مثل:
- انتو بتكدبوا الكدبة وتصدقوها ولا ايه.. امبارح كان متقال انه انداس تحت المدرعة والنهاردة مضروب بالرصاص والله مش عارف أقولكم ايه ، الله يرحم كل الشهداء الى ماتو على حق.
- المهاترات ليست بصالح مصر وليست بصالح المصريين انتبهو لمن يريد أن يفرقكم ويشعل الحرب الأهلية.
##
- عايزين تقتلوا فى الجيش و يقف يتفرج حراام عليكووو خافوا على بلادكم
- يعنى عايز تضربنى بسكينة و مش عايزنى حتى أقول أي ؟؟؟ إتقى ربنا
- أحبائي يا من قتلتمونا رغم كل ما فعلتموه بنا نحن أيضاً نحبكم كما أوصانا مسيحنا : "أحبوا أعدائكم باركو لاعنيكم أحسنوا إلى مبغضكم وصلوا لأجل الذين يسيئون إليكم" لذلك نحن نصلي لأجلكم في كل صلاة نقيمها، وأحب أيضاً أني ألفت نظركم انه مش جديد علينا اضطهادات ولا قتل وحرق كنايس لأن كنيستنا أساسا اتبنت على الدم والاستشهاد لذلك احنا فرحانين....... أما بالنسبة للناس اللي بتقول انه مكتوب في التوراه العين بالعين والسن بالسن، أحب أقولكم ان السيد المسيح له كل المجد قال بصيحيح العبارة : "سمعتم انه قيل عين بعين وسن وبسن ولكن الحق أقول لكم من لطمك على خدك الأيمن فحول له الأيسر أيضاً"
- الله يرحم كل أموات الناس يا رب ويغفر لنا جميعا .بس سؤال اللي ماتوا برضة من الجيش، مش دول برضة أهاليهم غلابة، مين مننا مارحش الجيش وشاف الأمر بتنفذه إزاي .مين اللي أتقتل وقتل مش 2 مصريين، فوقوا وعيشوا مع بعض، مفيش حد هيحمي المصري إلا جارة المصري، وبنرجع لبعض في الآخر، الشيخ اللي يقولك النصراني مش كويس متسمعش له وحذر منه، القس اللي يقولك المسلم مش كويس متسمعش له وحذر منه . القنابل مبتفرقش بين أهل البلد .ودمتم سالمين ومصرنا سالمة
- مكملين ولسة بردو مش خايفين مكملين رغم الفتن م الجلادين، مكملين ثورة بدائناها وخلاص ضد الفساد ومصممين علي الخلاص، مكملين عارفين طريقنا للميدان مكملين ملايين خلاص من كل مكان.