إزاى " تفك " من حبيبتك .. ؟!

"خلاص انتهي كل شيء بينا ومابقاش ينفع نكمل مع بعض " جمله شهيرة بين الأولاد بيقولوها في مواقف أكيد معظمهم مر بها، ساعات بيقولوها علشان عايزين " يفكوا " وخلاص..
وساعات يكونوا مضطرين لأن الظروف أقوي منهم ، طيب في كل الاحوال ممكن يفكوا ازاي ..و إيه الكلام اللي مابقاش ينفع يقال لأنه قديم و مستهلك .. تعالوا نشوف .
• "أنت تستاهلي واحد أحسن مني" سيبك من الجملة دي لأنها قديمة قوي و البنات بقت خلاص حافظاها، دور علي حاجه جديده يعني ممكن تقولها " انا لسه قدامي وقت كتير علشان خطوه الارتباط .. انا بحبك بس مش عايز اضيع وقتك وياريت النصيب يجمعنا تاني " و حاجات بالشكل ده و هي من نفسها اول ما تسمع الكلام ده هتقول " بالسلامة " .
##
• "خلينا اصحاب أحسن" دي برضه مينفعش تقولها لانها " مفضوحة جدا " و ياما قيلت في الافلام القديمة و الجديدة .. وكمان أوعي تقولها لان البنت اول ما تسمعها هتعرف انك عايز تفك و السلام، إنما قول لها انا مش عايز ابقي أناني .. صحيح انا سعادتي في وجودنا مع بعض لكن سعادتك عندي هي الاهم ، و انا لما فكرت كويس و اكتشفت اني مش هقدر أسعدك وحسيت ان وجودي في حياتك مالوش لازمه .. ويارب تقدري تلاقي الانسان اللي يقدر يعملك اللي انا بظروفي الصعبه ماقدرتش اعمله " ! .
• طيب لو ماكانتش ظروفك صعبة وهي عارفة كده ..تعمل إيه ؟! ساعتها عليك بجمله "انت مش ممكن تتخيلي انا بحبك قد إيه .. بس فيه حاجات كتير أهم من الحب علشان نقدر نستمر" و تبدأ تتكلم معها عن الاختلافات اللي بينك و بينها في العادات و الطباع و ياريت تأكد لها كلامك ده بمواقف حاولت تتغاضي عنها ، لكن مقدرتش و ممكن جدا تقول إن العيب عندك لإنك عصبي زيادة عن اللزوم و انك خايف عليها من عصيبتك ال over دي
##
• " انا كده و لو مش عاجبك براحتك" اوعي تقول كده او تحاول تعمل تصرفات تزهقها منك علشان تيجي منها لان ده هيخلي شكلك وحش قوي، و أكيد هي طبعا مش هتسكت وح تخلي اللي ما يشتري يتفرج عليك مع اصحابك و أصحابها، و هتطلع في اخر الفيلم انت الشرير .. علشان كده يا مان حاول انك تكون هادئاً و لطيفاً و انت بتفك .. و ممكن جدا تقولها بصراحة " إحنا ممكن نكون اتسرعنا في ارتباطنا ببعض و التجربه اكدت ده علشان كده ياريت نحاول ننهي العلاقة دي من غير ما حد فينا يوجع التاني " .
• سيبك من الكلام بتاع " انا السبب " و محاولة إلقاء اللوم علي نفسك و ظروفك لانهاء العلاقة .. لأنه كلام و جو بلدي قوي .. وكمان ممكن تصعب عليها فتتمسك بيك أكثر وساعتها هتعمل ايه يا حلو ؟!
• أما بقي لو كنت عايز تفك علشان ظهر في حياتك جو جديد فبلاش تتكلم عنه و لا تقارن بين الاثنين .. حاول بس تقول لها ان المشاكل اللي بينك و بينها اكدت ان الاستمرار مستحيل .
• "ماما مصممة تجوزني بنت خالتي و أنا مش قادر أزعلها" ده كمان جو قديم جدا و الشباب بطلوا يقولو ده من زمان .. يعني لو كنت ناوي عليه لازم تعرف ان شكلك هيبقي كداب وكمان هتظهر في الصورة بأنها الضحية .
• اخر حاجه بقي ممكن تعملها و كتير بتجيب نتيجه هايلة وهي " الطنااااااااااااش " .. و هي من نفسها هتخلع .