طارق نور : الحكومة بطلت تكلم الناس !

هو أشهر ملوك الإعلانات في مصر علي مدى سنوات طويلة، وحالياً هو صاحب أكثر القنوات المثيرة للجدل رغم أنها أقصرها عمرا ولا تبث برامجها إلا شهر واحد فقط.
تصوير: أميرة عبد المنعم
وهو يرى أنه المهني الوحيد الذي يمتلك قناة، كما يرى أن كل القنوات الأخرى تخسر وأنها باقية لتحقيق أجندات خاصة بأصحابها، تحدثنا معه بجرأة عن كل الانتقادات التي وجهت لقناته الرمضانية وعن حال سوق الإعلانات في رمضان 2010 وسبب غياب إعلانات " التوعية " الحكومية ..
لماذا كل هذا الهجوم على القاهرة والناس؟؟
لا .. مفيش هجوم خالص، بالعكس، الهجوم تأخر هذا العام، كنت مستنيه قبل كده بكتير..
نجحت القناة العام الماضي، فلماذا لم تكمل واقتصرت فقط على شهر رمضان فقط؟
انا قررت إن القناة دي شغالة طول شهر رمضان، وده علشان تكاليفها غالية..صحيح نسبة المشاهدة كبيرة لكنها " مابتجبش الإعلانات " ، بمعنى ان مفيش إعلانات كفاية إنها تعمل قناة، إنت تعمل قناة لما يبقى عندك أجندة تانية غير تجارية، يا اجندة حزبية أو مصالح، أي اجندة أخرى غير الإعلانات، وأنا راجل مهني، ويمكن أكون المهني الوحيد اللي عنده قناة، الباقيين رجال أعمال، زي الدكتور لما يكون عنده مستشفى، انا راجل بتاع تلفزيون وعندي تلفزيون، القاهرة والناس قائمة على فلوس الاعلانات، أما القنوات التانية فبتخسر..
حتى قنوات المسلسلات والأغاني؟
التلفزيون المصري يأخذ 2 مليار جنيه في السنة دعماً من الدولة، طيب ليه بياخد دعم لو كان بيكسب؟ كله يخسر..
طيب طالما كلها تخسر.. بتكمل ليه؟
لأن عندهم أجندات تانية غير انهم يكسبوا فلوس..
ولكن الملاحظة هذا العام أن الإعلانات قليلة عموما، ليه؟
بسبب الحالة الاقتصادية، الإعلانات دائما مرتبطة بالإقتصاد، لما الاقتصاد يكون كويس الإعلانات بتزيد، العملية عرض وطلب، فيه طلب على السلع ستكون فيه إعلانات، مفيش طلب لن تكون فيه اعلانات..
إعلانات الحكومة كانت ظاهرة في القناة العام الماضي، بينما غابت عنه هذا العام، لماذا؟؟
لأن الحكومة هوجمت العام الماضي، بما فيها اعلانات القطارات، هاجموها، فبطلوا، الحكومة بدل ما تعمل " إعلان إرشادي " علشان تحافظ على القطار أو علشان وباء إنفلونزا الخنازير ولا تاخد منك ضرائب، بطلت تكلم الناس.
لماذا اشتريت برنامج "ضد التيار" وقد سبق إذاعته في قناة أخرى؟
برنامج وفاء يعرض بالتزامن مع قناة ال بي سي التي بدأت عرضه من فترة، لكنهم يذيعون حلقة في الاسبوع، نحن نذيعه كل يوم، يعني في الايام القادمة سنسبقهم ، ومفيش مشكلة انني اشتري برنامج من قناة تانية، ايه اللي يمنعني ؟
ألا ترى أن بروموهات هذا العام فيها إشارات جنسية صريحة ؟
يعني مافتكرش انها حاجة غريبة، مش انت بتتفرج على الانترنت ؟ اتفرج على اي مسلسل عربي ستجد فيه حاجات زي كده، احنا في 2010!!
هل صحيح أنه بعد نجاح برنامج " لماذا " في العام الماضي " تم فكه " هذا العام بثلاثة برامج من نفس النوعية التي تعتمد على فضائح النجوم؟
طوني خليفة استاذ ومذيع ثقيل الوزن، وهذا ظهر أكثر في بلسان معارضيك، إنما المحتوى كما هو ..وأقصد الصراحة والجرأة ، يعني لما عمرو أديب بيتكلم مع ضيف بيتكلم بجرأة، محمود سعد نفس القصة، لميس الحديدي وهي موجودة على القناة الأولى بتتكلم بجرأة، لما واحد بيسمى برنامج "حمرا" فهذه جرأة أيضا، وكل هذا على التلفزيون المصري، انت النهارده بتكلمني على تلفزيون القاهرة والناس، طيب ليه ماتكلمتش عن كل دول؟؟ وفي النهاية أنا صاحب قناة ولا أتدخل في التحرير..
ولكنك السنة الماضية تدخلت كثيرا في مونتاج البرامج..
طارق نور لا يتدخل في الرقابة، لكن عندنا قسم رقابة، هل تتصور إني قاعد 24 ساعة للقناة علشان ألحق كلمة؟
بحث ميداني زي العسل، مش شايف إنه بيطلعنا " ناس عبيطة " ؟
على فكرة، بعد هذا البرنامج كل الناس العبيطة دي هتخاف إن أي حد ينزلها يقولها أي كلام فتصدقة، يبقى البرنامج ده هادف ولا مش هادف؟؟ مش هيتعلموا غير بكده!!
لماذا قسمت البرامج وجعلتها تعرض على أجزاء؟؟
علشان أنا بتكلم عن قناة مش على برنامج، عاوزك تتابع القناة من غير ما تقلب لأي قناة تانية، اعتبرها " نباهه " ..
ألا ترى أن صوتك الذي كان يوضع على الفوازير أعطى انطباعاً بانها شبه الإعلانات؟؟
كلامك صح ، ما هي إعلان فعلا !
ليه إخترت جمال البنا علشان يقدم فقرة دينية؟؟
علشان هو راجل منطقي وعلمي وأنا بحبه جدا وناس كتير بتحبه !
ولكنه شخصية عليها جدل كبير ؟!
زي ما انت ليك حرية في الإختيار أنا ليه حرية في الاختيار، هذا رجل يتكلم عن حرية الفكر، وأنت كشاب لازم تتكلم عن الحرية، وهو بيدي معلومات والمعلومات مفيش اتنين بيختلفوا عليها..
لماذا كتبت على مسلسل الجماعة "بدون حذف بدون رقابة"، بينما صرح أسامة الشيخ أن ما تعرضه القاهرة والناس هو نفس ما يعرضه التلفزيون المصري؟؟
أنا فعلا لم أحذف شيئا من المسلسل، ولم أتكلم عن أي قناة أخرى، أنا قلت واقع، حقيقي محدش حذف منه حاجة، إنما الفكرة متعلقة بالإخوان، لما تقول "بدون رقابة وبدون حذف" ينتظر إن لازم يكون في حاجة، يعني دي إفتكاسة إعلامية مني..
ما المختلف في الدراما هذا العام؟؟
أقدر أعترف أنه لأول مرة هذا العام تسبق الدراما المصرية الدراما السورية، مسلسل الجماعة تحفة فنية، نفس تكنيك فيلم "الأب الروحي"، أنا ماشوفتش التكنيك ولا الصدق ده قبل كده، ولا حوار ولا إخراج، حقيقة برفع قبعتي للمؤلف والمخرج.
بحسابات الإعلانات، ما هو المسلسل رقم واحد في رمضان؟؟
الجماعة.
ورقم 2؟
ممكن العار!!
في البرامج؟؟
كل برامج القاهرة والناس..
من المذيع الذي كنت تريد وجوده في القاهرة والناس؟
كنت عاوز محمود سعد وعمرو أديب ومعتز الدمرداش ومنى الشاذلي، لكنهم " حصرياً " في أماكن أخرى !