بالفيديو.. خناقة بين محمود سعد ونادر بكار بسبب إتهام المتظاهرين بحرق مقار الإخوان

وقعت مشادة كلامية بين الإعلامي محمود سعد مقدم برنامج "آخر النهار"، ونادر بكار المتحدث باسم حزب النور السلفي، وذلك بسبب إصرار تيارات الإسلام السياسي على التظاهر يوم السبت المقبل في ميدان التحرير تأييدا لقرارات الرئيس محمد مرسي.
وقال سعد: "أنا أطلب منكم التفكير في مظاهرات يوم السبت عشان متحطوش الكبريت جنب النار، المتظاهرون متواجدون أصلا في الميدان ومينفعش نقولهم امشوا عشان احنا نيجي".
وعقب بكار عبر مداخلته الهاتفية قائلا: "إحنا مقلناش لحد يمشي، ومش احنا اللي بنعمل مشاكل، الناس كلها عارفة مين المؤدب ومين المحترم، مش احنا اللي بنحرق المقرات واحنا ملتزمين بالشرعية وعمر ما حد فينا مد إيده على مقرات حد تاني".
فقاطعه سعد قائلا: "إنت كدة بتقول على المتظاهرين "صيع" لما تثبت إن حد حرقها من المتظاهرين تبقى تتكلم، قبل كدة الإخوان اعتدوا على المتظاهرين أمام مجلس الشعب"، ورد بكار: "واحنا داخل مجلس الشعب اترمى علينا مولوتوف"، فقاطعه سعد: "لأ ده محصلش".
وقال بكار: " أنت بتكدبني؟!، أنا مش بتهم المتظاهرين بأنهم اللي عملوا كده بس بطالب بالتحقيق في الموضوع ده، ولا داع للقلق يوم السبت المقبل ولن تحدث احتكاكات، والميدان ليس حكرا على أحد، إحنا عاوزين الإعلام يبقى محايد ويطرح وجهتي النظر، وانتقدوا الرئيس زي مانتو عاوزين ولكن الانتقاد يبقى ايجابي".
وعقب الإعلامي محمود سعد: "إنت بتقول وجهة نظرك، وانتم ماليين التليفزيونات، وما دام إنكم مؤمنون بالحرية فيجب أن تتركوا المعتصمين في حالهم، دا حسني مبارك متجرأش يدخل ميدان التحرير ولما نزل مؤيدون له نزلوا في مصطفى محمود".
الفيديو