أبيض ولا أسود .. اسمه " كذب " فى النهاية !

حبيبتي أنا عندي شغل وهتأخر.. معلش صاحبي تعب وأضطريت أكون جنبه.. أنا عندي مأمورية شغل بجد هتوحشيني.. دي بعض الجمل اللي بيقولها أي شاب علشان يكدب على خطيبته .. لأنه بيعمل العكس.. فممكن يكون سهران مع أصحابه أو عنده أي حاجة تانية ممكن تعمل له مشاكل مع خطيبته..علشان كده بيضطر يكدب عليها علشان يخرج من " النكد " .. تعالوا نعرف حكاية الكدب مع المخطوبين...
أنا عندي كذبة دائما بقولها لخطيبتى لدرجة إن أصدقائي لما بيسمعوني بكلم خطيبتي يقولوا (كذبة كل يوم هتشتغل)، وهذه الكذبة بتكون دائما أن المدير كلفني بشغل ولازم أسهر لبعض الوقت في المكتب علشان أخلصه، والسبب في هذه الكذبة هي عصبية خطيبتي والمشكلة اللي بتحصل بينا لما بتعرف أني رايح القهوة مع أصحابي، فكنت الأول أقول لها الصراحة والمكان اللي رايحه، ولكن بعد كده وتجنبا للمشاكل اخترعت الكذبة دي.. ده كان سبب عماد عبد الرحمن على- 27 سنة محاسب- في الكذب على خطيبته.
أما مهاب محمود سليمان-30 سنة مهندس ديكور- السبب االلي خلاه يكذب على خطيبته هو " زميلاته في العمل " .. ويقول: طبيعة عملي كمهندس ديكور هى الانتقال بين أكثر من موقع في اليوم الواحد .. وفى بعض الأوقات تكون معي زميلة مكلفة بمتابعة نفس مواقع عملي، وطبيعي إنى أوصل زميلتي معى لإنه مش معاها عربية ورايحة نفس المكان ..فلازم أعرض عليها أوصلها، فكانت خطيبتي تتصل بي وأنا في العربية، وبكل حسن نية أقول لها أنا معايا "فلانه" فتتحول 180 درجة وتبدأ في سؤالي وكأنها وكيل نيابة " إيه اللي خلاها تركب معاك ، وبعدها أنفعل، وتحدث مشكلة كبيرة، وعلشان كده لما بتسألني مين معاك في العربية بقولها أنا لوحدي، فالغيرة هي السبب في الكدب.
وبيقول رامي حسام الدين-26 سنة موظف بشركة سياحة-: قبل الخطوبة كنت في الصيف بسافر مع أصحابي للمصيف، ولكن بعد الخطوبة كنت هسافر مع أصحابي زي كل سنة، وقلت لخطيبتي فلقيت أسلوبها في الكلام اتغير، وكأني قلت لها أنا مسافر أشوف عروسة، وبدأت تسألني أنت ليه هتسافر مع أصحابك ما تسافر مع أهلك ، فقلت لها لما بسافر مع أصحابي بكون مبسوط أكتر .. فكان الرد " طبعا لازم تكون مبسوط ما أكيد بتعاكسوا بنات هناك وبتتعرفوا عليهم " ، حاولت أفهمها إن اللي بتقوله ليس له أي أساس من الصحة ولكن تفهم فى مين، وده غير اتصالات التأمين اللي كانت بتعملها كل يوم أثناء سفري، فلجأت للكذب عليها، ولما بكون مسافر مع صحابي بقول لها أنا مسافر مأمورية للشغل لأتجنب النكد.
حبيبتي صاحبي تعب فجأة وهروح المستشفي معاه.. دي كذبة علي عبد الفتاح- 27 سنة مدرس- واللي بيقول: أنا والله غصب عني بكدب على الست خطيبتي، لإنها بتغير جدا، لدرجة إنها بتغير عليا من أصحابي، والقهوة بالنسبة لها ضرتها، وعلشان كده بتحجج بأي حاجة علشان أخلص من أي نكد، وأمري لله.
أما عن رأى الدين في النوعية دي من الكذب ..يقول الشيخ عبد الحميد الأطرش- رئيس لجنة الفتوى وأمين عام الدعوة بالأزهر سابقا-: الكذب في جميع أحواله حرام إلا في ثلاثة مواضع من بينهم أن يكذب الزوج على زوجته والعكس بأن يقول لها أنى أحبك وهو لا يحبها وهذا من أجل بقاء الحياة الزوجية، فغير ذلك حرام ، وعلى صاحبه وزر، وإذا قرر الرجل فتح بيت فيجب أن يقوم هذا البيت على المودة والاحترام والصراحة بين الطرفين، لأن الكذب كما قال رسول الله صلى الله عليه وسلم يهدى إلى الفجور.