تامر حسني: فكرة "عسل أسود " ضايقتني !

قال الفنان تامر حسني أنه شاهد مؤخرا فيلم أحمد حلمي "عسل اسود" وأعجبه جداً إنه ركز على الجوانب السلبية في مجتمعنا ، وأضاف " لكن في نفس الوقت - وأنا هتكلم بصراحة – أنا أحب أشاور على الغلط لكن ما أحبش أنشر غسيلنا للعالم كله ، ضايقتني الفكرة " .
وأضاف تامر في تصريحات خاصة ل " الشباب " : ما لم يعجبني في الفيلم هو فكرة نشر غسيلنا أمام العالم كله ، ماكنتش أحب إن العالم كله يشوف إحنا ننظر لبعض إزاي، خصوصا إن الفيلم ماكانش فيه الجانب الآخر، يعني هو كل ما عندنا في مصر سلبيات ؟ فين الإيجابيات في الفيلم؟ كان نفسي أشوف إيجابيات في قدر المساوئ التي أظهرها الفيلم، وبعدين لما تجيب واحد غلبان، زي الرجل اللي كان سايق الموتوسيكل، وينطق لك كلمة إنجليزي غلط، ماينفعش تعاتبه، لأنه رجل بسيط وده مش في تعليمه، تعاتب دكتور في الجامعة ونطق كلمة إنجليزي غلط، أما الرجل الأول فأساسا ماتعلمش، ولو إتعلم هيبقى في مدرسة حكومي، وده مش مطلوب منه ينطق الإنجليزي زي أهله أصلا.
وأنهي تامر كلامه قائلا: في المجمل انا رحت الفيلم مع عائلتي وكلنا خرجنا مبسوطين منه وحلمي عمل الدور حلو جدا، وأنا كلمت كل الممثلين المشاركين في العمل لأبارك لهم على آدائهم المتميز فيه.