ده شكلي ..وأنا مرتاحة كده !

دينا عبد الرحمن هى مذيعة اختلفت عليها الآراء بين مؤيد ومعارض لأدائها الإعلامي .. لكن لم يختلف أحد علي نجاح برنامجها " صباح دريم " ، وفى هذا الحوار سنعرف رأيها فيمن ينتقدون طريقتها في الحوار وسبب عدم متابعتها للعاشرة مساء وماذا تعلمت من أستاذها محمود سعد .
كتبت : هاجر إسماعيل
بدايتك كانت من خلال برامج المنوعات ازاي عملت النقلة لبرنامج توك شو ؟
هي دي طبيعتي ودي ثقافتي وكانت البداية لابد ان تكون من خلال برنامج خفيف لان في الاعلام العربي مفيش مذيع بيبتدي ببرامج حوارية او سياسية او فيها مناقشات اجتماعية وكان التصنيف يتم حسب السن والخبرة اما الآن فالثقافة اتغيرت واختلفت فالآن مين يقدر يعمل ايه .
دينا دائما تتهم بأنها تفرض رأيها علي الإعداد إيه رأيك في الكلام ده ؟
انا دقيقة جدا وملتزمة بمواعيدي جدا وكمان مقدرش استضيف حد مش مقتنعة بيه ومينفعش حد يكتب لي كلاماً لأقوله وخلاص وانا غالبا بعد النقاش بوصل لاتفاق معين يرضيني ويحقق هدف البرنامج .. فانا من الناس اللي صعب علي جدا اقول معلومة وانا مش واثقة منها لاني متحملش اشعر بخيانة أمانة وثقة المشاهد عشان كدة الدقة مطلوبة خاصة في شغل الهوا .
مساحة الحرية الموجودة في صباح دريم نفس المساحة الموجودة في العاشرة مساء؟
معرفش لاني لا اشاهد أي برنامج مسائي لاني بالليل بكون بذاكر وبجهز لتاني يوم وبالتالي معنديش وقت اصلا لمشاهدة اي برنامج سواء العاشرة او غيره من برامج التوك شو المسائية .


ولكن هذه البرامج تعتبر منافسة لبرنامجك ومشاهدتها ضرورية ؟
أنا مليش منافس فبرنامجنا بينافس نفسه وفريق الاعداد بيناقش كل الموضوعات اللي بتهم المجتمع ولا نقحم أنفسنا في فكرة المنافسة ومين قدم ايه .. ورد الفعل اللي بيجيلنا من الجمهور بيحسسنا إن احنا ماشيين في الاتجاه الصح .
يري البعض ان البرنامج يقدم موضوعات ثقيلة لا تناسب البرامج الصباحية ؟
مين اللي صنف البرامج الصباحية علي أنها برامج خفيفة وبعدين احنا هدفنا من البرنامج واضح احنا لنا توجهنا وهدفنا واضح وهو كل حاجة تهم الناس وتخصهم احنا بنهتم بيها .. ولا الناس الصبح مبيكونش عندهم مشاكل او مهتمين بقضايا تمسهم .

موعد البرنامج الصباحي لا يسبب لك مشكلة مع الضيوف ؟
كان عندي مشكلة لان البرنامج ميعاده بدري جدا لكن الان البرنامج أصبح معروفا نسبيا ولديه جمهوره وبالتالي لم أعد اواجه هذه المشكلة مع الضيوف مثل بداية البرنامج .
هل لديك خطوط حمراء او موضوعات ممنوع الاقتراب منها؟
اناقش كل الموضوعات بحرية كبيرة ولكن بالطبع لدي خطوط حمراء موجودة لكل الناس ولكل البرامج وانا عموما بحب أكون موضوعية وبناقش الامور من الاتجاهين الحكومي أو المعارض .
امتي بتقرري تقاطعي الضيف علي الهواء خاصة انك من المذيعين اللي بيتاخد عليهم الجزئية دي؟
أحيانا بيكون فيه استرسال في المعلومة اللي بتكون وصلت وخلاص عرفتها , في هذا الوقت ليس أمامي بديل غير أني أوقف الضيف خاصة أن فيه نوعية من الضيوف مش عاوزة تتحاور انما عاوزة تقول بيان وده مش دوري .

البرنامج مش بيسعي لعمل أي سبق أو خبطات صحفية تليفزيونية؟
مش بتشغلني ابدا فكرة السبق ويمكن السبق يناسب اكتر البرامج المسائية وأنا بعتبر إن احنا برنامج خدمي يقدم المعلومة للناس .

اللغة التي تستخدمينها في البرنامج كلاسيكية رصينة لكنها تبدو غير مناسبة للبرامج الصباحية؟
هي دي لغتي وانا مبمثلش لاني بستخدمها في حياتي ومش شايفة اني في حاجة لتغييرها أو تغيير طريقتي وبصراحة مش واثقة إذا كنت اقدر اغيرها ولا لا وهي عموما تركيبات .
وبالنسبة لشكلك عمرك مافكرت تعملي نيولوك؟
ده شكلي وانا مرتاحة كده ، بس ممكن اعمل تغيير بسيط لكن تغيير كامل بيكون صعب علي لاني بحب الاستقرار جدا .

دايما مقدمي البرامج الصباحية بيكون عندهم إحساس بعدم التأثير أو أنهم بيكلموا أنفسهم جالك الإحساس ده؟
ولامرة ولا حتي في بدايات البرنامج لانه طول الوقت كان فيه مشاهدون وإحساسي طوال الوقت ان فيه جمهور بيخليني اشتغل بحماس .
ظهور محمود سعد في البرنامج كان له فرق في جماهيرية البرنامج؟
طبعا لان محمود سعد استاذي من بداية عملي في الصحافة وكمان مشاهدته بس في التليفزيون شيء كافي جدا للتعلم منه لانه في حد ذاته مدرسة واتعلمت منه ومن ذكائه وكيف أنه بيدفع ثمن حب الناس الشديد له مصداقية وحضور وثقافة .
مين الشخصيات اللي بتتمني تستضيفيها في البرنامج؟
فاتن حمامة وفيروز نفسي بس اشوفهم واقعد معاهم .