أكيد طبعا سمعت عن جمال " مرسى مطروح " واللي بتعتبر من أجمل شواطئ العالم بشهادة كل اللي زاروها... و ده طبعا بسبب جمال و نعومة رمالها البيضاء و مياهها الشفافة متدرجة الألوان . اجمل ما في مرسى مطروح الطابع المصري اللي بيغلب علي كل مظاهرها بداية من زوارها والناس اللي أساساً عايشين فيها .. و نادراً انك تلاقي اجانب في مرسى مطروح و كأن طبيعة المكان أصدرت حكماً بمنع دخول غير المصريين عشان أهل البلد يقدروا يستمتعوا بيها بشكل اكبر . لو قررت انك تروح مرسى مطروح لازم تعرف ان المسافة بينها و بين القاهرة حوالي 290 كيلومتراً .. يعني سفر 6 ساعات تقريبا ، وفيه اماكن كثيرة تستاهل انك تزورها في مرسى مطروح اولهم شاطئ الأبيض و أهمهم شاطئ عجيبة اللي هو فعلا عجيبة ربانية ... و طبعا شاطئ كليوباترا اللي فيه حمام كليوباترا الصخرى ، و أوعي تنسى تزور شاطئ الغرام وتتصور جنب صخرة ليلي مراد . و للأسف فيه ناس كثيرة بتزور " مرسى مطروح " و ماتعرفش أساسا ان في اماكن جامدة جدا ممكن تزورها هناك زي مخبأ روميل و الأسطول المصري اللي كان موجود قرب الميناء و هو عبارة عن بقايا اسطول من ايام البطالمة ... كمان هناك كنيسة قبطية قديمة جدا تم تشيدها في أوائل العصر القبطي ، و ممكن كمان تزور متحف العالمين ... و تشوف مقابر ضحايا الحرب العالمية .