فين أيام الأتاري أبو دراعات ؟!

فاكرين أيام زمان من حوالي 15 سنه لما كنا بنقعد بالساعات نلعب على الأتاري أبو دراعات..كان الجهاز ساعتها بحوالي 100 جنيه ، وأى شاب كان لا يملك الأتاري زمان كان بيعاني من مشكلة لأنه كان تقريبا الوسيلة الوحيدة للترفيه وممارسة الألعاب الإلكترونية .
ووقتها كان فيه اللي بيروح يلعب عند واحد صاحبه واللي بيروح لأحد كافيهات ال games ، وكان ساعتها الجيم بخمسة قروش تقريبا وماكانش بيزيد عن ربع جنيه، ولكن الغريب أنه زي الموضة لما بتحن لكل ما هو قديم .. الواضح كده ان جيلنا بيشعر بالحنين لهذا النوع من الألعاب برغم انه بقى فيه أنواع أحدث تقدم من خلال تقنيات أمتع بكثير ، ولكن تقريبا هناك من اقتنع بالمثل القائل "من فات قديمه تاه " فقام شباب المنتديات برفع الألعاب القديمة على الإنترنت لتبادلها مع الآخرين ... تعالوا نفتكر الألعاب دي ونعرف تاريخها كان إيه...
سنة 1951 حاول المهندس الياباني (رالف باير) صناعة أفضل مجموعة ترفيه تلفزيونية في العالم "TV Set",و اقترح إضافة الألعاب في المشروع ده, لكن اقتراحه تم رفضه ، وفي سنة 1954 فكر مهندس تاني اسمه (ديفيد روسين) في صنع ألعاب تشتغل بالعملات المعدنية، وعمل شركته في طوكيو، وسماها (سيجا)، وفي سنة 1958 اخترع الفيزيائي (ويلي هيجينبوثام) لعبة تنس طاولة تفاعلية، والاختراع نجح، وعرض اللعبة على شاشة بطول 15 بوصة، وفي سنة 1961 صنع الطالب ستيف روسيل أول لعبة فيديو جيم تفاعلية، واسمها (space war)، وفي سنة 1967 نجح رالف باير في صنع لعبة فيديو تفاعلية يمكن اللعب بيها على التليفزيون، وفي سنة 1971 اتعملت أول لعبة "أركيد" الشهيرة، وكانت بتتلعب على جهاز أبيض وأسود ، وبعد كده بحوالي 5 سنين ظهرت شركة (أتاري) في اليابان، وبدأت الشركات تتنافس في المجال ده ، وبدأت الأجهزة تتطور.
أما بالنسبة للألعاب فأشهرهم كانت لعبة pac man أو كما كنا نسميها الأكالة والتي احتفلت بها google من فترة قريبة وقد تكون أخذت شعبية في الفترة الحالية أكبر من شعبية لعبة طيران النجمة اللى كانت صعبه علشان الدبابيس السريعه (زى الصورايخ فى الطيران العاديه) وكل ما نضرب النجمه نزيد 500 والألوان تتغير، وكان فيه ألعاب بيت النمل وبيت النحل والماسورة الصغيرة والماسورة الكبيرة ، وكمان لعبة عسكر وحرامي ، وكان فيه لعبة المراكب وبنزيد نقط لو أكلنا السمك وبنزيد محاوله كل 5000 نقطة،وكمان لعبة الكورة اللى كان الفريق فيها 3 لاعبين بس عاملين زى قوالب الطوب بيتحركوا مع بعض فى الدفاع أو الهجوم !!، وكما كان فيه لعبة السباقات الجامدة ، وكان فيه لعبة الملاكمة.