بحور العشق

للبحر اللي ناوش حزني
عن سيرة هواكي
فتكسرت تباريح العشق موج ورا موج
سألت عنك حارس النوته
قيدت اسمك من زمن ع السطر
وخداني فين؟
والسؤال بيدور
تعبتي قلبي فاشتهي يهمد
وقفله قد يومين
ورد الوداع ملاني بالحياة فرجعت
علي نبض قلبك
زي تلميذ في ابتدائي
رددت بحماس الطابور
رفرفت ومليت الفضا
أسراب طيور
أنا اشتهيت هذا الهوي فهويت
هويت ..
هويت لحد قلب جوف الأرض
صليت صلاة العشق سنة وفرض
وحبست النفس
لما طلع نور الحقيقة المختفي ف لمعة عنيكي للسما
سحاب محمل بأحلام المحرومين
أينما تمطر ستأتيني زهور العشق
وأنا والسالكين درب المحبة نهتدي فنتوب
جلجل جرس فرس الخيال الجامح الآتي
أنا طير بيفرد ع الحياة جناحاته
وبيخفي كعوب الطهر عن نهر العطشانين
يا نخلتين شقوا الفضا
غني السعف علي صوت حبيبتي في البراح واتمايل
غنيوة بتقول للحبيب البعد لو طول كمان
أشكيك لعصافير استحمت في الخضار
وزقزقت صبح اتكسي شجر وجداول ميه
وضحكة صبية اتنططت علي رقص الفراش
طارت روايح الجنة بستاتين وضفاير
وأنا قلبي مين قده الساعة دي
نغزه الهوي فاضت بحور الغنا ملو السما تقاسيم
رشقت نفسي في العياط
دمع السنين شقق خدود كراسة التعبير
كتب المدرس كلمة شكر ف الهامش
نجمة حزينة بتواسي الوجع ف آخر سطر
كلمت القمر
رسملي علي وش الترعة بساط من ضي
شجر وزهور
ضحكة بتداري كسوف الغمازات
سهرانة علي سيرة الحبيب
سلملها روحه
فتحت مداخل الجنة أبوابها
ركنت قلبي ع النغم والغنا
منديل وفارد نفسه ع الهوي بريحة صبر وغرام
برفان فرايحي عباني
ضفرت بالشوق انتظاري وابتديت
مال القمر ع الشجر
بيداري حسنه وطلته
ميلت ألملم توب الفراق وأنشره ع الروح
لف السؤال ماسبش عتبة ودار
دفنت وش الانتظار بين الضلوع
يا هل تري...
إمتي الرجوع..؟.