أمينة وسي السيد رمضان 2018

احم احم !

- رمضان كريم يا سي السيد ما يكونش ياخويا كاتبين في الجرنان إللي أنت ماسكه من الصبح ده رمضان إمتي بالظبط؟
- يا الأربع يالخميس يا أمينة رمضان كريم ياختي سيبيني بقي أكمل الجرنان.
- حاضر حاسيبك بس اعمل حسابك بقي علي تلات اربع خمستلاف جنيه علشان ننزل نشتري حاجات رمضان إنت عارف الأسعار بقت عاملة ازاي!
- خمستلاف عفريت أما يركبوكي يا أمينة هو أنا قاعدلكم علي بنك مانتي عارفة يا ولية البير وغطاه ثم مليون مرة أقولك لما أكون منهمك في قراية الجرنان كده بلاش تكلميني في أي موضوع من مواضيعك الهايفة دي!
- أحب علي يدك يا سي السيد ماتزعل مني.. بس ماتخأذنيش ياخويا هو يعني إيه إللي في الجرنان واخدك مننا كده أوي ع الصبح؟
- شكلها حاتخرب أهي علشان ترتاحي انتي وولادك!
- خير بس اللهم اجعله خير ياسي السيد؟
- ييجي منين الخير طوال ما المجنون ترامب عمال يلوش في العالم كله علشان خاطر السنيورة إسرائيل؟
- ليه كفي الله الشر عمل إيه تاني إللي مايتسماش ده؟
- تصوري المجنون ده انسحب من الإتفاق النووي إللي بينه وبين إيران؟
- لولولولويييييييي الله أكبر يحيا العدل!
- بتزغردي علي إيه يا ولية يا خرفانة إنتي وإيه إللي يفرح في الكلام ده؟
- ده معناته إن الأسعار حاتنزل يا سي السيد.. شايف بركات الشهر الكريم بدأت تهل علينا إزاي!
- أسعار إيه إللي حاتنزل يا أمينة وإيه علاقة النووي وانسحاب أمريكا بالأسعار.. هو انتي بدأتي تخاريف الصيام قبل رمضان بأسبوع ولا إيه؟
- ركز انت بس معايا ياخويا وخدني علي قد عقلي.. ما هو لما الحرب تقوم بين إيران وأمريكا يقوم الدورال الأمريكاني يتنيل علي عينه وينزل ويرحمنا بقي وترجع الأسعار رخيصة زي زمان هي مش كل حاجة في مصر سعرها بقي الطاق طاقين وتلاتة بسبب المدعوق الدورال ده!
- هههههههه الله يحظك يا أمينة اسمه دولار يا ولية مش دورال ثم جبتي الكلام الخطير ده منين.. ده انتي بقيتي فشر خبراء الاقتصاد إللي مصدعينا ليل نهار في التليفزيون!
- بتتمهزأ بيا يا سي السيد الله يسامحك.
- طب خلاص ما تزعليش حقك عليا بس يعني مش كل إللي تسمعيه في التليفزيون تصدقيه يا أمينة.
- حاضر يا سي السيد بس طمني ما يكونش مكتوب عندك في الجرنان الحكومة حاتعملنا إيه في رمضان؟
- عملالنا عمايل يا أمينة إفرحي وزأططي!
- وغلاوة سيدنا الحسين يا سي السيد؟ طب قولي زودتنا كام؟
- زودت مرتبات ومعاشات الوزراء والسفراء ييجي تلاتين أربعين ألف جنيه!
- طب واحنا يا سي السيد؟
- احنا زودتنا أربعة بجنيه بحالهم علي بطاقة التموين!
-يعني مازودتناش زي الوزراء حتي ألفين ولا ألف.. هو إحنا مش مكتوب لنا نشوف الآلافات دي يا سي السيد؟
- مين قال كده احنا حانشوف في رمضان ده ييجي كده خمستلاف مسلسل.. مبروك عليكي يا أمينة!