عندك قلم؟

عندك قلم؟
حافظ عليه.. واهرى الورق بيه شخبطة
وارسم وشوش مابيعشقوش طعم البُكا
وارسم كفوف متشبكة
وارسم ف برد الليل غطا
ورينى شغل العفرتة
واملا فراغ الكون خطوط
عندك قلم؟
حافظ عليه واحميه من الخوف والسكوت
وأما الزمان هيفوت عليه
بكرة تلاقيه نبوت غُنا
ورينى شغل الفتونة
واحرس على باب البيوت
واحمى الضعيف وإللى انضنى
واقطع دراع الأخطبوط
وازرع فى قلبك سوسنة
عندك قلم؟
حافظ عليه
ولما ضهرك ينحنى
شوف القلم تلقاه صديق
دايماً يصاحب سِكتك
يسند خطاويك إللى شابت ع الطريق
ويكون لسانك لو زمانك سكَّتك