عين يمين!!

ريشة عماد
ف أول مقابلة ما بينه وبينها
وأول ما عينه ما غرقت ف عينها
عرفها وهى كمان عرفته
ما هم ياما كانوا بيحكوا له عنها
وعن شمس دافية تزين جبينها
بنورها اللى معرفشى يوم سكته
لكنه ف عهد الطفولة البرىء
ماكنشى مصدق بإن الحكاية بحق وحقيق
حكاية أميرة بتسحر عقول
تشوفها تصيبك بحالة ذهول
يا دوب بسمة منها وهمك يزول
ونظرة ف عيونها تنجى الغريق
بتبكى ف يبكى معاها الحجر
تغنى بغناها يهيم النسيم
وترقص ف ترقص فروع الشجر
ويتهز عوده ف تفرش وروده عشانها الطريق
ما هى الأميرة وست الصبايا
تحل الضفيرة تدوب المرايا
وأتارى الحكاية بحق وحقيق
وأتارى الحقيقة تفوق الخيال
وأتارى السنين اللى جاية تصالحه
بتلعب لصالحه.. وتطوى المحال
وتختار بدقة الزمان والمكان
وترسم مقابلة ما بينه وبينها ف وسط الميدان
ف تمسح دموعه.. وهمه.. ودمه اللى ع الحلم سال
ونظرة رقيقة ف عينه اليمين
تقول إنت مين؟
ونظرة ف عيونها ملاها الحنين
ترد السؤال
ف يهتف بصوته يهز الجبال
ويبكى ودمعه يزيد الحماس
ويحلف بإنه مصدق خلاص
وإنه معاها هيحكى الحكاية لكل العيال
وينسى الرصاص اللى ساب الشظايا ف عينه الشمال