خدنى معك

أغنية خدنى معك للمطربة اللبنانية سلوى القطريب مش مجرد عمل موسيقى دى تجربة شعورية متكاملة بنشوف فيها بكلمات رقيقة حنين للطفولة والذكريات، وكمان فيها الأمنيات للرجوع للوقت اللىّ كنا فيه أنقى وأبسط، لما كنا أطفال.
من أول كوبليه نستشعر الحنين للطفولة المتمثلة فى الدرب البعيد والحياة المليانة براءة وأمان، هنا بنسمع صوت سلوى البديع وهى بتطلب العودة لزمن انقضى لما مكانش عندنا هموم ولا مسئوليات.
فى تانى جملة من الكوبليه تطلب وتحلم بالدفء اللىّ كانت بتشعر بيه فى ربيع عمرها وده بوضوح فيه ضمنية أنها تشير للتناقض بين فترة الشباب بدفئه والنضوج ببروده.
الأغنية بتلعب على وتر الذكريات فى وقت الطفولة والشباب وبتتمنى عودة الدفا ده من خلال شمس جديدة تسطع وترجع الدفء المفقود وتنسّينا أننا كبرنا.
واضح جدًا إن فى إحساس عام بالحزن لما عدينا مرحلتى الطفولة والشباب دول وكأن الكِبر جه ومعاه ثقل وهموم مكانتش موجودة قبل كدة.
جمال الأغنية فى رمزيتها البسيطة العميقة وفيها خوف عذب من ضياع الذكريات والمغنية عايزة تفضل متشبثة بالماضى بكل حلوه وأمانه وشبابه.
وفى الكوبليه التانى تطلب من حبيبها الهروب إلى عالم منسى فيه اللون الأزرق غاب وهى إشارة للأفق أو البحر عند المغيب وده رمز للحلم والذكريات اللىّ تلاشت مع الزمن وبتطلب من حبيبها انهم يمشوا على الأرض الرملية اللىّ فيها أعشاب وده تعبير أنها أرض بريئة وطبيعية وده بدوره بيعكس الرغبة فى العودة إلى البساطة ولأماكن لم تفسدها تعقيدات الحياة.
كما تطلب الاحتواء والاختفاء فى الطبيعة وأن تذوب فى أحضان الهواء أو الريح وتهرب من الزمن نفسه.
وتتمنى النسيان والتخلى عن ثقل النضوج والعمر.
ومع هذه الرغبة فى النسيان هى تتمنى الشعور بالبراءة والحرية التى فقدتها مع مرور السنين.
الأغنية مؤثرة جدًا لأنها بتتكلم عن شعور عالمى كل شخص فى مرحلة ما من حياته بيحس بيه وبيبقى عايز يستعيد لحظات من الماضى أو حتى فى الهروب إلى مكان أكثر صفاء كان هو فيه النسخة الأصغر والأنقى من نفسه لما كبر.
اللحن حالم وهادى ومفيهوش دربكة، أما صوت سلوى القطريب فهو الحصان الرابح فى الأغنية دى، صوت رقيق مليان إحساس وده ادى الأغنية ثقل عاطفى ومصداقية حقيقية.
وكمان أداء الأغنية مكانش مجرد غنى ده ترجمة حقيقية للمشاعر العميقة المرتبطة بالطفولة والذكريات.
صدقت سلوى لما قالت:
خدنى معك على درب بعيدة مطرح ما كنا ولاد صغار
دفى ربيعى بشمس جديدة نسينى يوم لصرنا كبار
خدنى معك يا حبيبى يا حبيبى مطرح ما لون الأزرق غاب
نمشى سوا ياحبيبى ياحبيبى عأرض الرمل اللى فيها أعشاب
وقول للهوا يا هواى نسينى، نسينى يوم اللىّ صرنا كبار.…
نسينا يوم اللىّ صرنا كبار.