مولد وصاحبه غايب

كنا قاعدين ومبسوطين فى أمان الله فى فرح أعز صاحباتى كل حاجة حلوة ال DJ العريس والعروسة والقاعة والبوفيه فجأة دخل جيش من ثلاثين أربعين راجل الواحد فيهم يجر قطر لوحده، ولا الهكسوس اترقصوا وطلعوا على الحيطة ومشيوا على السقف زى المجانين.. أعداد كبيرة من الرجال اتلموا على المعازيم وعددهم أكثر منهم كل كام واحد واقفين على ترابيزة مما أثار الرعب، وخلى المعازيم تجرى والستات تصوت والعيال تاهت، وتزاحم الناس على باب الخروج وكأنه يوم الحشر إللى اتعور واللى طلع بعاهة وسمعت بعد كده إن أم العروسة رجلها اتكسرت وفى الجبس من يومها، وأبو العروسة اتشوه أثناء محاولته للهروب من حركات المطرب ال « OVER» وعرفت أن العروسين فى مصحة نفسية من يومها، ولكن الآن حالتهما فى تحسن والحمد لله بعدما علما بالقبض على المطرب اللى قاعد يغنى فى مزرعة طرة وحدانى ها أعيش كده وحدانى.