حكايات .. يوم التلات بقي لونها بمبي!

المشهد الأول، ليل/ داخلي، غرفة بها مكتب أنيق يجلس عليه رجل وخلفه هالة من النور، الكاميرا تركز علي لوحة قابعة في أحد أركان الغرفة مكتوب عليها 8 أغسطس 2030.
موسيقي أغنية «يا حبيبتي يا مصر».. للمطربة شادية مصاحبة للمشهد.. صوت يملأ المكان كاد «مسعد» يعرفه.
- مسعد: مين؟!.. الصوت ده.. مش غريب عليا؟
- الأب: لحقت نسيت صوت أبوك يا ابن ال........... .
- مسعد: بس أنا مش مصدق إنك أبويا الله يرحمه.. ممكن توريني بطاقتك؟
- الأب: ما أنت عارف.. ما عنديش جيب ورا.
- مسعد: طاب وريني أي علامة مميزة أفتكرك بيها.
- الأب: ماشي.. أدي أثر الغرز اللي أخدتها بسبب خناقة طابور العيش.
.. المشهد الثاني: ليل/ داخلي، حديث أسري بين الأب والابن.
- الأب: المهم يا ابني.. أنا واخد إذن ساعة «م» المدافن ولازم أرجع.. طمني عليك؟
- مسعد: ما تقلقش.. الحياة بعد مماتك اتغيرت موازينها.. دي بقت فلة شمعة منورة.
- الأب: يعني إيه الكلام ده؟
- مسعد يعني هتافات المشجعين للمنتخبات العربية علي حدود فلسطين شجعت المسئولين في إسرائيل علي التفاوض مع الفلسطينيين فاتحلت القضية الفلسطينية بسلام.
- الأب: يا سلام!!!!
- مسعد: والمسئولون بعدما فشلوا في حل أزمة الزحام في منطقة وسط البلد قرروا يحولوها لمحمية طبيعية يزورها الهاربون من السحابة السوداء «المؤذية».
- الأب: ما شاء الله!
- مسعد: والطبقة الوسطي رجعت تاني بعد قانون وجوب الزكاة علي الموظفين في الأرض والديمقراطية العربية بقت مثالاً يحتذي به في العالم كله.
- الأب: وإيه كمان؟
- مسعد: وأفلام «للكبار فقط» المصرية وصلت للعالمية وبقت تاخد جوايز أوسكار، وأشهر الحروب الفنية بين عمرو دياب وتامر حسني انتهت بدويتو غنائي باسم «أنت الغالي» بتوزيع جديد.
- الأب: أيوه كده.. فرحني يا ابني.
- مسعد: ومعاهدة حقوق الإنسان بين الدول العربية والغربية اللي اتبنتها رئيسة أمريكا ساشا باراك أوباما خلت كل إنسان ياخد حقه «تالت ومتلت».
- الأب: ده الحياة كده بقي لونها بمبي بجد.
- مسعد: والكورة العربية تطورت خالص لدرجة أن المنتخب القومي حصل علي كأس العالم بعد فوزه بصعوبة علي منتخب السودان.
- الأب: روح يا ابني قلبي وربي راضيين عنك.؟