خيالك بين إيديك

لما الواحدة فينا بيكون عندها مناسبة هتحضرها وبتدور على حاجة تلبسها.. عادة أول حاجة هتعملها إنها هتبص فى دولابها وتشوف إيه أفضل حاجة، أو تنزل تلف فى المحلات وتقيس حاجات.. وأكيد هتقعد مع نفسها ولو خمس دقايق تتخيل نفسها لابسة الحاجة دى وتشوف هتبقى حاسة إنها مرتاحة ومبسوطة بيها ولا لا.
أو العكس.. بتتخيل هى نفسها تبقى لابسة إيه، إيه الانطباع اللى عايزة تسيبه أو إيه الحاجة اللى هتريحها نفسيًا وبعدين تنزل تدور عليها.
ولو انت عندك اجتماع مهم فى الشغل أو بتحب جديد.. عادة بتقعد مع نفسك شوية وتتخيل المعاد ده.. هتقول فيه إيه وهتتكلم بأى صيغة.. (هابقى هادى وماحدش هيستفزنى) ولا (حهب فيهم ومش هدّى فرصة لحد)، (هاسبّل واضحك وأفرفش) ولّا (هاقلب الترابيزة وكرسى فى الكلوب).
ما حدش فينا ما حصلش معاه موقف من دول أو موقف مشابه.. بس اللى بيعدى علينا هو إننا غير منتبهين لأهمية وقوة الخيال فى حياتنا، وازاى إنك أما بتقعد مع نفسك وتتخيل أى موقف، ده بيديلك ثقة وإصرار على تحقيقه، وغالبًا بتحققه وتبقى مبسوط.
ده حتى مو صلاح فخر العرب أما عمرو أديب سأله فى حوار تليفزيونى بتجيب جون إزاى؟ قال له أنا باتخيل الأجوان الأول وبعدين انزل أحققها.
كل ده بيثبت لنا حاجة واحدة بالفطرة أهه والعلم كمان أثبتها.. هى أن للخيال قوة إيجابية وسيطرة على حياتنا وإننا نقدر نستغل قوة خيالنا ده.
العلم بيقول إنك لازم تتخيل أى هدف نفسك توصل له عشان توصل له فعلًا.. لأن العقل مش بيعرف يفرق بين الخيال والحقيقة، فلما بتتخيل إنك حققت حاجة العقل بيتعامل معاها على أنها حقيقة.. يعنى لو انت عايز تدى محاضرة فى مكان بس خايف وقلقان.. اقعد مع نفسك واتخيل نفسك بتدى المحاضرة.. شوف تفسك لابس إيه، واقف فى القاعة ولّا قاعد، اسمع نفسك وأنت بتدى المحاضرة، دخلتك هتكون واثقة وقوية ولا هتهزر ودخله مش رسمية، اتخيل المحاضرة كما تحب أن تكون.. صدقنى هتقوم مرتاح تمامًا، كلك ثقة فى نفسك وهتحققها زى ما شفتها.
والعلم راح لأكتر من كده.. العلم أثبت أنك لو كنت موظف صغير فى بداية حياتك واتمنيت إنك عايز تبقى مدير الشركة بتاعتك فى يوم ما.. أقعد مع نفسك واتخيل نفسك قاعد فى مكتب المدير. وشوف نفسك لابس إيه، مين من الموظفين دخل عندك، هتتكلم معاه إزاى،، هتطور إيه فى الشركة.
التجارب البشرية حوالينا أكدت إن اللى بيتخيل هدفه بالتفصيل.. 100 فى ال 100 بيوصل لهدفه لأن العقل بيبدأ يمدك بأفكار تساعدك وحلول لحاجات بتتخيلها وبيزود ثقتك فى نفسك.
الخلاصة،، إننا لازم نتعلم نستغل القوى الفطرية اللى ربنا أودعها جوانا.. واللى فعلًا بنستعملها بلا وعى وبتنجح معانا.. خلينا بقى نستعملها بوعى ونشوف هتفرق كتير فى حياتنا إزاى.