عبدالرحمن الأبنودى

مسحراتى يامصراوية
ف مصر تسرى روحى .. بروية
مسحراتى يامصراوية
يدق قلبى تسمعنى هية
أبويا مدى البشر هدية
وجدى مدى الحنان هوية
وفوق سطوحى للحب غية
يطير ويرجع يلاقينى طاير
وحبيبتى واقفة ف المشربية
مسحراتى طيب وراضى
نور الملايكة ملو الأراضى
ملايكة حاضرة
وطايرة بينا
صلوا معانا على نبينا
يارب وأنت علام غيوب
أنا نفسى أتوب
ونويت أصوم لك
صيام مُطهّر من الذنوب
•••
مسحراتى والدرب واعر
طعم المرارة ف الحلق .. يخلق
أبنودى واحد .. وبلاد مشاعر
نغمة ربابة ف الأرض تعزق
ياعم جابر .. سمّعنا شاعر
يقدر يغنى من غير ما ينطق
كفاية يحضر ..
يشع نوره ..
العشق كاتب .. جواز مروره
إلى الحوارى ..
إلى الغيطان
كأن صوته ..
صوت الزمان
كأنه دمعة ف عيون وهيبة
ساعة ما تحلم بالبرتقان ..
عدّى نهاره
ونهارنا عدّى
ولسه حتة م الشمس صامدة
ولسه .. لسه .. الليالى صابرة
وأبسط الأمنيات معاندة
•••
أبنود .. مُجاهدة
والعيشة مُرّة
لكن بتبعت أغنية حُرة
أغنية توجع
والثانية سارّة
والصدق صافى ف كل مَرّة
يا كل شاعر على الربابة
تعالى واسمع مرسال غلابة
أبنودى واحد
شراعه فارد
علشان يلملم هوا العلالي
صبحنا أمة .. ف قلب واحد
يجمع سيرتنا مع الهلالي
•••
رمضان ناداني
والقلب لبّي
تعالى واشرب
من المحبة
والبركة تملا جامع ودير
وكل ثانية واحنا بخير
•••
بدايته رؤية ونهايته رؤية
يا دنيا .. صحرا ..
رمضانى .. ساقية ..
تروينا جمعا بشر وطير
وكل ثانية واحنا بخير