شم النسيم السنة دى.. بيض .. بس

شم النسيم.. لما نتمعن فى الكلمتين دول.. نجد أن الربيع مرتبط ارتباطا لصيقا.. بالشم! وعندما نتمعن أكثر فى مظاهر الاحتفال بشم النسيم نجد.. فسيخ.. رنجة.. وطبعا معروف أنهما ذوا رائحة نفاسة ونفاذة فى نفس الوقت.. أما الغريب فهو وجود البيض فى مظاهر شم النسيم.. وهو بعيد كل البعد عن الروائح من هذا القبيل..

إذن لماذا رغم هذا أصبح البيض مظهرا مهما وبالألوان فى شم النسيم؟! تعالوا نفكر مع بعض.. يمكن القدماء المصريين كانوا يقصدوا حاجة تانية.. يمكن كانوا متنبئين بالأيام البيض..ة اللى احنا عايشينها دلوقت.. وحاسين إن أحفادهم من جيلنا هيكون شم النسيم فى المقام الأول بيض أكثر منه فسيخ ورنجة.. أرجوكم مش عايزة حد يفهمنى غلط.. ويعمل إسقاطات مش مقصودة.. أنا قصدى اقتصاديا مش هيبقى احتفالنا غير بيض.. ملون! ويمكن السنة دى مانلونش.. مش نقص فى الألوان ولا كسل.. بس يعنى هنلون إزاى وكل يوم انفجار.. كل يوم ناس بتموت! يعنى مش أصول.. وكمان مش هنعمله بالقطن دقن وشنب.. يمكن شنب إنما بيض بدقن.. لأ.. لأ، عندنا كتير.. مرسى جابهم وبدرهم فى البلد وبقت مليانة دقون على بيض.. أشكال وألوان كمان.. وهم دول تحديدا.. اللى هيخلوا شم النسيم بتاعنا السنة دى.. بيض بس!

شوف هتفهمونى غلط تانى أهوه.. قصدى برضه لأن المشاكل اللى عاملينها فى البلد مخلية الحالة الاقتصادية مش ولابد فلذلك وعلى أد إمكانياتنا المادية والنفسية.. هيكون بيض!
محبوسين فى البيت خايفين ومرعوبين.. عايزة أرخص العربية وأجدد الرخصة ومش قادرة لأن السيطرة الله يرحمها ويحسن إليها كان برضه حواليها ظباط وعساكر كتير لما فجروها ومالقتش حتى عربية إسعاف تنقلها على المستشفى!

ولو الواحد خرج واتشاهد على روحه وتوكل على الله.. ودخل قعد فى أى مكان.. تلاقى خناقات فى كل مكان.. شد وجذب.. شتيمة وتهديد.. كلام فى السياسة.. أنا مع السيسى.. لا أنا مع حمدين.. دولة عسكرية لا مدنية وفجأة تلاقى واحد شبه البيضة الأومليت خارج يقولك.. الرئيس مرسى مازال الرئيس الشرعى!! ساعتها مابفكرش ولا بييجى فى بالى إلا .. البيييييض .. ومش ملون.

تروح بيتك.. تتفرج على التليفزيون.. تلاقى ناس بتنظر وناس بتهزر.. ناس بتفتى وناس بتهزى.. وواحد فى قناة بيقول رأى كان قايل عكسه تماما من يومين على قناة تانية !! بيض مفيش فايدة.

أما عن يوم الجمعة فحدث ولا حرج يوم ممشش أصلا.. شوية ناس مغيبة ماشيين فى الشوارع يكسروا ويحرقوا ولو سألت واحد فيهم إنت عايز إيه؟ بتعمل كده ليه؟.. يقولك بحارب عشان الإسلام !! إسلام مين يا سيدى؟ يقولك بنصر الدين الإسلامى! .. إنت بتنصر الدين الإسلامى؟! بإيه؟ بالدم؟! بالسلاح؟! يحلف لك ميت يمين إنه عمره ما ضرب رصاصة ولا خرب ولا كسر.. وهو ماسك فى إيده إزازة مولوتوف! حقيقى مفيش فى حياتنا أكتر ولا أرخص من البيض!

تروح بقى للجامعات والحركة الطلابية اللى كل يوم خناقات مع الداخلية.. اشتباكات وضحايا.. قطع طرق.. بلطجة.. مين دول؟ طلبة! دول شكلهم مش طلبة يا جماعة.. طيب دول مين؟.. وبعدين دول معاهم سلاح ومولوتوف واحنا الداخلية بتاعتنا ناعمة وحنينة وما تقدرش تواجه الحاجات دى.. آخرهم بيض.. يمسكوا الناس اللى بتحدف بيض يعنى.. مش مولوتوف.. أصل العمر مش بعزقة!

طبعا الواحد بعد كل ده ضغطه بيعلى.. دماغة هتنفجر ولوحدها من غير قنابل موقوتة ولا بريموت.. يفكر يروح لدكتور.. أكيد لا.. لأن الموضة دلوقت.. أدخل المستشفى على رجلى.. أخرج فى صندوق تقولش الواحد رايح العراق! تسأل: ليه.. إزاى ده كان كويس.. يقولولك.. سورى معلش.. الدكتور غلط غلطة بسيييييطة أد البيضة البلدى.. فحصل مضاعفات.. فالمريض.. مات.. هارد لاك.. البيض للجميع.. قصدى البقاء لله.

أما خناقات البيوت بين الأزواج وبرضه بسببب البيض.. ناس الزوجة عايزاه عيون.. وهو عايزه أومليت.. ويدخلوه فى السياسة تقوله هاكله عيون لجل عيون السيسى.. وهو يقولها لا أومليت عشان يفكرنى بخطابات مرسى! بجد مش معقول ما هو فى الآخر كله بيض.. بيتاكل يا ناااااس وهناكله.. بالذوق بالعافية هناكله.. وخصوصا فى شم النسيم ده.. لأنه كله بقى غالى إلا البيض.. أرخص ما فى حياتنا الآن.. شم نسيم سعيد عليكم إخوانى المصريين.. وكل سنة وأنتم طيبين والسنة الجاية تتفك الأزمة ويختفى البيض من حياتنا.. وناكل كافيااااار.