واحة الإبداع.. أمى العزيزة

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. الحكمة فى أجمل أثوابها.. فى هذه الصفحة نجمع شذرات من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين. إن كنت تمتلك موهبة الكتابة والإبداع.. شارك مع فريق «روزاليوسف» فى تحرير هذه الصفحة بإرسال مشاركتك من قصائد أو قصص قصيرة «على ألا تتعدى 055 كلمة» على الإيميل التالى:
[email protected]
اللوحات للفنان مصطفى عيسى
أمى العزيزة
كتبت: نهي فرح
إحساسى وأنا بكتبلها
إحساس ب أول يوم مدرسة
قلقانة جدًا متلخبطة
مش عارفة أمسك فى القلم
و إزاى هرص فى الحروف
وأنا كُلى خوف
ماهو مش قصيدة والسلام
ولا رص فى شوية كلام
راح يوفوا ربع حقها
فى مرايتى لما ببصلى
بشوفنى حلوه زيها
إكمنى يعنى فى الشبه.. بشبه لها
لون عنيا وشكل وشى
بتعرف من وسط كل العيلة إنى بنتها
إحساس ساعتها ما يتوصفش
الست دى أشبه لها
أمى العزيزة وباختصار كل البراح
مش عارفه أقولك كلمتين
حقيقى جدًا
مش عارفه أبدأ منين لفين
إنتِ الوحيدة اللى اتقسم وياها
حزنى بالفرح بالذكريات
إنتِ الوحيدة اللى إتحكى
ليها اللى فات ومن سكات
قولتيلى ياما أكتبلك إنتِ سطرين قصيدة
وكأنها سهلة وبسيطة
الكتابة يا ستى إنتِ
عنك إنتِ شئ عويص
زى نجمة فى ليل غطيس
فإزاى هغازل حبها
وأنا ماشية بيها فى ضلها
إزاى راح أكتب عن مادة خام الحياة
إكسير بيدينا الحياة
طب حطى نفسك مطرحى
بالزمة حضنك يتحكى
إزاى راح أوصف عن حضن
لما يضمنى
بإنى طير من غير جناح
و جوة حضنه الكون براح
إزاى راح أوصف الدعا
اللى ملازمنى فى كل خطوة
وأنا عارفة إنى ماشية بيه
ازاى راح أوصف لمعه الحب فى عنيكى
والدفا اللى فى سلامك بين إديكى
إزاى راح أوصف كل ده
ازاى راح أوصف روح تروح
لو بس صابنى فى يوم جروح
أو عينى دبلت مالبكا
ما هو فى الحقيقة ما يتوصفش
إزاى راح أوصف حضن شجرة
فى وسط صحرا جمب منها بير حنان
طب حط نفسك مطرحى
والتضحيات والأمنيات والذكريات
ودموع نجاح
ودموع فرح
ودموع زعل
ودموع قلق
ودموع حاجات ما بتتحكيش
واحدة كل همها
إمتى أكبر وأبقى أحسن منها
واحدة عاشت عمرها
بتشوف شبابها فيا أنا
فى حاجات كتيرة قلبت فيها
قبل ما أبدأ بالكلام
فى سنين عجاف وسنين ظراف
وسنين كتير مش واخده بالى منها
إمتى كبرنا
وكنا فين
و وصلتى بينا لحد فين
كان مركبك بشراع دعا ومقداف وحيد
قادر يعدى فى الحياة
كنتى القوية الطيبة
كنتى الجميلة المؤمنة
كنتى اللى واثقة فى ربنا
كنتى الزمام وإنتِ السلام
وبرغم كل الأسئلة
كنتى برده الأجوبة
كنتى أب و كنتى أم
ولما برد الليل يضم
كان فى حضنك ميت دفا
كنا حِمل وف عنيكى كنا حَلم
بتحققيه بعيون جمال
ونفس راضية و طيبة
ومهما كبرنا فى عنيكى
لسه بنحبى بأربعة
تكوين غريب مالتضحية
صعب جدا يتوصف
فأعفينى من غير اسئلة
قدام جنابك
حقيقى بحبى بأربعة