عطية: «مفيش حاجة فى الإسلام اسمها خيانة زوجية»

قال الدكتور مبروك عطية، الداعية الإسلامى، إنه لا يوجد شىء اسمه خيانة زوجية، مضيفًا: «المسلسلات والأفلام هما اللى أقنعوا المرأة بده، وأن مافيش حاجة اسمها خيانة زوجية، وأنا محتاج 10 سنوات عشان أشيل الكلام ده من مخ الستات».
جاء ذلك ردّا من «عطية» على تصريحات سابقة له، عندما نصح إحدى المتصلات، بالصبر على زوجها ودعوتها له بالتوبة، حتى وإن خانها مع سيدة أخرى.
وأضاف «مبروك»، فى لقائه بقناة «أم بى سي»، مساء الخميس: «لما الراجل ينام مع واحدة تانية غير مراته، دى خيانة لربنا، وليست للزوجة، وهاتلى كلمة فى الشرع واحدة تقول إن ده خيانة للمرأة»، موضحًا أنه «عندما تجد المرأة زوجها يزني، عليها استحضار الشرع، وتأمره بالاستحمام، ثم الاستغفار والصلاة،».
وتابع: «المسلسلات خيمت على رأسنا، وبوظت فهمنا للدين، وبردوا لو الراجل وجد الست نايمة فى حضن آخر، يأمرها بالاغتسال، وبعدها يطلقها كما يحب، مش يمشى ورا الأفلام ويقتلها، ويدخل السجن، والدين أمر بستر الزانى، وبعدها يحاسب».
وكانت سيدة تدعى أم دينا وجهت سؤالا ل«عطية» فى برنامجه «الموعظة الحسنة»، أن زوجها أغلق باب الشقة وكانت معه الخادمة بالداخل، ورفض فتح الباب لي، فرد عليها «مبروك»: «يعنى أنت دلوقتى عايزة تطلقى؟، يا أختى السوق مش حلو، وبعدين لو سيبتى ده هتتجوزى عمر بن الخطاب؟، يا هبلة ده هو أهبل منك علشان يقولك كان فيه حد معايا».
وأضاف: «لو دخلتى ولقتيهم فى لحاف واحد، قوليله قوم يا أخويا استحمى، لو بتحبى سيدنا محمد قوليله ربنا يتوب عليك يا بن الناس، واحمدى ربنا إنه عافاكى».