«بالعقل نبدأ» شباب بيطوع الدنيا بالتفكير

تدهور الحالة العامة للبلد، ورؤيتهم أن كل حاجة في البلد مبتتعملش بشكل سليم، دفعهم إلي البحث عن مناطق الخلل في المجتمع وسد الثغرات اللي بيتسرب منها الفشل اللي بيجتاز كل حاجة بنعملها، فتوصلوا أن الانسان اللي هو المواطن وحدة بناء المجتمع والدولة هو اساس الشغل وبداية البناء فقرروا انهم يؤسسوا جمعية يحققوا من خلالها مشارعيهم، فكانت نقطة الانطلاق في ديسمبر الماضي ببدء العمل في جمعية «مشاريعهم.. بالعقل نبدأ».. عمر بكداش، عضو مؤسسة في (بالعقل نبدأ) وباحث ومحاضر في مجال الغزو الفكري، قال: إن القائمين علي المشروع كلهم شباب اعمرهم متتخطاش 35 سنة، متخرجين من كليات في مجالات مختلفة اغلبهم من كلية الطب، واكد «عمر»: «احنا في (بالعقل نبدأ) نظرتنا للاشياء عامة مش جزئية، لان الرؤية الجزئية في كتير من الاوقات بتكون ليها مدلول ونتائج ايجابية في حين ان الايجابيات دي بتنتج وضع سلبي في اطار المنظومة الكلية».
مازن أبوالفضل، باحث ومحاضر، وأحد المؤسسين الستة في الجمعية قال: (بالعقل نبدأ) نشاط شبابي غير هادف للربح قائم علي الجهود الذاتية، بدأناه لما لقينا ان المجتمع ناقصة اشياء كتير مهملة من قبل الدولة والتيارات السياسية، اهمها أن إزاي الانسان يفكر بشكل السليم، وياخد قراراته عن وعي ودراية وبأسلوب علمي صحيح، ودا دفعنا لتأسيس كيان (بالعقل نبدأ)، علشان ندعم المجتمع من خلال المساهمة في محو الامية الثقافية والفكرية عند الناس البسيطة عن طريق كورسات مبسطة، وكمان عمل ندوات ثقافية وأمسيات ادبية وفكرية لاطلاع الناس علي ثقافة الآخر، إضافة إلي وضعنا مناهج للتوعية في مجالات مختلفة منها العقلية والفلسفية والسياسية والاجتماعية والادارية، وتقديم كل الخدمات دي بشكل مجاني تطوعي للاحزاب السياسية والحراكات الاجتماعية الشعبية ولاي جهة او منظمة او شركة تحب تحصل علي الكورسات دي والاستفادة منها.. مازن اضاف: «مشاريعنا في (بالعقل نبدأ) متنوعة ابرزها مشروع تنمية المهارات السياسية والميدانية اللي بيأهل الشباب علي كيفية ادارة الحملات الانتخابية بشكل جيد، اضافة الي الالمام بفن التفاوض السياسي، وقدرة الانسان علي تنمية الوعي وتحليل الوضع من حولية وادارة العمل الميداني، كمان من اهم مشاريعنا المشروع الخاص بالتنمية العقلية وبناء الذات اللي بندرّس فيه ايه هي معوقات التفكير السليم، وايه هي المهارات الاساسية في التفكير، دا إلي جانب عدد تاني من المشاريع الخاصة بالحضارات والنظام العالمي والعمل العام».. اكد «مازن» ان مشروعهم ملوش اي توجهات او اجندة سياسية، وانهم شباب كل همهم الارتقاء بالبلد، لكنه اشار في نفس الوقت الي عدم ممانعة القائمين علي المشروع في المشاركة في العمل السياسي سواء بإبداء الرأي في القضايا والتفاعلات السياسية اللي بتحصل في الشارع، أو عن طريق تبني طرح سياسي شايفين انه الاصلح للبلد والناس.