عيد سعيد يا ريس

كل سنة وانتم طيبين، عيد سعيد، اضحى مبارك، دى المعايدات المتعارف عليها بين الناس فى العيد، وبتكون المعايدات بين الاهل والاصحاب والاقرباء واجبة علشان تدخل البهجة قلوب كل المصريين، وبما اننا صفحة هدفها توصيل صوت الشباب لكل الناس «اتكلم» ادت للشباب مساحة علشان تعيد على المسئول اللى تختاره، وتقوله كلمة من القلب.

ومتشكرين على كيلو اللحمة أبو 100 جنيه


منار جابر، 28 سنة، شاعرة، وجهت رسالة مفتوحة لكل المسئولين اللى فى مصر قالت فيها: «انا عايزة أعيد على كل المسئولين فى مصر، واقول لهم متشكرين قوى انكم نضفتوا الشوارع بالزبالة الزيادة، متشكرين قوى على كيلو اللحمة اللى بقى ب 100 جنيه، متشكرين قوى على التعليم العالى الهايل اللى عيالنا بيتعلموه وبيطلعوا فى الاخر ولا حاجة، متشكرين اوى على الوظائف اللى زى ماهى غير متاحة الا بالواسطة، متشكرين بجد وعيد سعيد على انبوبة البوتاجاز اللى بقت ب 55 جنيه، يا بلاش، عيد سعيد يا مسئولين البلد، وشكرا لكم».




بعثت منير محمود، 19 سنة، مخرج افلام وثائقية، معايدة لشخص رفض تسميته لكنه اشار إليه ب «مسئول النهضة» قال فيها: «عزيزى مسئول النهضة كل سنة وانت طيب وعيد سعيد عليك وحابب اقولك اننا محتاجين نظامنا الحالى يبقى واعى لكل شئ ونحاول نصلح من انفسنا و من اللى حولينا و كل واحد مننا يساعد البلد حتى تنهض عيد سعيد وكل نهضة وانتم بخير و حسبى الله ونعمة الوكيل».

تهنئة زمزم عمار، 35 سنة، محامية، وجهتها للرئيس محمد مرسى قالت فيها: «عيد سعيد يا ريس وكان الله فى عونك لأن من حولك من مسئولين يفتقدون الخبرة وهتغرق البلد، يا ريس عايزين نتخلص من طابور العيش اللى ما بيخلصش والزبالة اللى فى كل مكان وتضخم الأسعار وزحمة المواصلات، مبقاش فى حاجة اسمها نقل عام وسواقين الميكروباصات بيتحكموا فى خلق الله يا ريس».

زكريا الجروانى، 35 سنة، محاسب، اختار انه يعيد على محمد رشاد وزير المواصلات ووزير الكهرباء فقال: «يا معالى الوزير نظرة للمعديات اللى كل يوم والتانى بتنهار وبتغرق واحدة شكل، ليه ما يكونش فى كبارى فى القرى والنجوع علشان ترحم الناس، ما هو لازم تلاقى حل فى المرور فترة العيد الناس بتخرج من بيوتها ماتعرفش هى هترجع تانى ولا لأ، وطبعا بنعيد على وزير الكهرباء لإرتفاع أسعار الكهرباء خمسة اضعاف على الرغم من ثبات الإستهلاك، وانقطاع الكهرباء المستمر، اضافة الى مياه الشرب اللى لا تصلح للشرب إلا فى وجود أربع فلاتر فى كل بيت، ونعيد على وزير التعليم ونطالبه بضبط المناهج التعليمية وتوفير كتب الترم الأول للطلبة».

فكرى فتحى، 33 سنة، موظف، «عيد سعيد صحة عيد سعيد تموين عيد سعيد إسكان .. عيد سعيد نقل ومواصلات .. عيد سعيد مرافق تالفة وبلاعات مفتوحة .. إلى كل وزراء الوزارات السابقة أدام الله عليكم وعلينا السعادة »

يحيى هاشم، صاحب دار نشر، يوجه تهنئته للعامرى فاروق وزير الرياضة فيقول«ماتتعبش نفسك الدورى مش هيرجع دولة الالتراس أقوى من دولة الرياضيين»

اقترح محمد صلاح فى تهنئته بالعيد على المسئولين تغييرعبارة «عيد مبارك» و«عيد سعيد» ب يستبدلوها ب«عيد شهيد»، ايمانا منه بحق الشهداء اللى محدش اقتص ليهم لحد دلوقتى.

نادر راضى، موظف، بعت برسالة معايدة الى الرئيس مرسى بيطالبه فيها بخفض الأسعار الاغذية، فقال: «رخص اللحمة يا ريس خلى الناس تاكل و تتبسط».

قال عبد الرحمن سامى فى معايدته: «كلنا هنعيد فى بيوتنا وفى أمهات بتعيد من غير أولادها لأنهم ماتو من أجل الحرية التى لم تأت حتى الآن المجد للشهداء».


أحمد عفيفي،32 سنة، ناشط حقوقى «كل سنة والجماعة بخير، اهدى معايدتى للنظام كله نواب الرئيس ومستشاريه ومحافظيه، عيد سعيد يا ريس».