«ف. ن»: منتقبة بمزاجى.. وصداقة الأولاد حرام.. ومش هتجوز متشدد

■ عرفينا بنفسك؟
- أنا «ف.ن» طالبة فى رابعة طب جامعة عين شمس.
■ هل انت مرتبطة؟
- أنا لا مخطوبة ولا متجوزة دا مفهوم الارتباط عندى، أما الارتباط اللى بين معظم شباب اليومين دول انهم يتواعدوا من غير ما الأهل يعرفوا ويكون المعرفة فى نطاق الأصحاب بس فده حرام وميرضيش ربنا لأن ربنا قال «لا تواعدوهن سرا».
■ إيه هى مواصفات فتى أحلامك؟
- لازم يكون ملتزم، وعلى فكرة محدش بيكون متدين 100%، مش هتفرق بلحية ولا لأ، المهم ميكنش متشدد.
■ هل ليكى أصحاب أولاد؟
- لا طبعا كل أصحابى بنات وملتزمين كمان.
■ إيه رأيك فى الصداقة بين الولد والبنت؟
- الصداقة حرام طبعا مينفعش ولد يصاحب بنت لأن ده مخالف للشرع، وكمان الصداقة بين الولد والبنت بتكون فى إطار الجواز بس.
■ إيه رأيك فى الاختلاط بين الشباب والشابات فى الدراسة والعمل؟
- ياريت ميكنش فيه اختلاط لأنه بيضر فى بعض الأحيان لكن للضرورة أحكام يعنى أنا فى كليتى فى شباب وبنات بس البنت هى اللى بتختار أنها تختلط أو متختلطش وأنا مش بختلط بأى أولاد ومش بتعامل مع أى زميل إلا فى إطار بحث بنعمله مع جروب كبير وبيكون التعامل كلمة ورد غطاها.
■ فكرتى تغيرى من مظهرك؟
أنا لسه مغيّراه، أنا منتقبة من سنة تقريبًا وراضية بمظهرى كده، لأنى مقتنعة أن النقاب فرض، وقبل النقاب كنت بلبس خمار وعلى فكرة محدش أثر علىّ وأقنعنى بالالتزام أنا اللى أخذت القرار لوحدى وبمزاجي محدش من أهلى عارضنى قالولى أنتى حرة مدام مش بتعملى حاجة غلط.
■ هل تعتقدى أنك ممكن تكونى فتاة أحلام بعض الشباب؟
- أكيد، وعلى فكرة فيه شباب بيحب يتجوز بنات منقبات ومش مهم المظهر أهم حاجة الجوهر والصفات الشخصية،كفاية أني هراعى الشخص ده وهحافظ عليه وعلى ماله وعرضه فى غيابه وأى شاب بيدور على الصفات دية.
■ طب افرضى اتقدم لك واحد فيه المواصفات اللى بتحلمى بيها بس اشترط عليكى تخلعى النقاب وتلبسى حجاب عادى هتوافقى عليه ولا هترفضيه؟
- لا طاعة لمخلوق فى معصية الخالق .. طبعا مش هرضى أتجوز حد بيقولى أخالف شرع ربنا والحجاب بتاع اليومين دول أصلا بدعة مش حجاب شرعي، والشخص اللى يعرف ربنا كويس عمره ما هيطلب منى طلب زى ده.