يُعتبر محمد ابراهيم لاعب مصر المقاصة واحدا من اللاعبين المتميزين في الكرة المصرية وأحد نجوم الفريق خلال هذه المرحلة، ورغم أن اللاعب كان نجما في صفوف الزمالك وتنبأ له الجميع وقتها بأن يكون لاعبا مميزا في صفوف الفريق الابيض, الا ان اللاعب ترك الزمالك في ظروف غامضة ورحل ليبدأ مشوار جديد من اندية اخري وتنقل بين اكثر من نادي حتي استقر في المقاصة ووجد راحته داخل النادي الاكثر احترافية في مصر خلال هذه الفترة, لذلك كان RiadaNet.com حريصاً على اجراء هذا الحوار مع اللاعب المميز ومعرفة ارائه في مايحدث في الرياضة المصرية خلال هذه الفترة. تصريحات محمد إبراهيم لRiadaNet.com: - الدورة التنشيطية تهريج.. وكويس انها اتلغت - مش هنموت لو لعبنا الكأس من غير الاهلي والزمالك - كلنا "جبناء" .. ومفيش مسئول بيراعي ربنا - اللي عمله شحاتة للكرة المصرية في سنوات ضاع في لحظات - راحين علي ثورة جياع ... وعايزين رئيس محترم حتي لو كان فلول - فى البداية نرحب بك فى RiadaNet.com - أشكرك وأنا سعيد بتواجدى معكم وأتمنى ان اكون ضيفا خفيفا على القراء . - ما رأيك فى حال الكرة المصرية خلال الفترة الحالية بعد أحداث مذبحة الأهلى والمصرى؟ - ما تعيشه الكرة المصرية حاليا "كارثة " بكل المقاييس من كافة النواحى ومأساه لم ولن تتكرر فى إعتقادي، فالأمر لم يتوقف عند إلغاء بطولة الدورى وتجميد النشاط الرياضى ولكن للأسف وصلنا لمرحلة القتل والإجرام فى مباريات كرة القدم . - وما سبب مجزرة بورسعيد فى إعتقادك؟ - فى رأيى الشخصى ان حالة التعصب الشديدة التى عاشتها الجماهير المصرية فى الفترة الأخيرة كانت سببا رئيسيا فى مذبحة بورسعيد وأصبح هناك إحتقان شديد بين جماهير الأندية والبعض بدأ ينظر لمباريات الكرة كأنها موقعة حربية وليس لعبة تنافسية لابد من خروج فائز ومنهزم فيها . - وهل إقامة الدورة التنشيطية خلال الفترة القادمة سيكون تعويضا كافيا عن إلغاء بطولة الدورة؟ - إتحاد الكرة والمسئولين إتخذوا قرار إقامة الدورة التنشيطية لمنح الأندية واللاعبين مستحقاتهم وتجنبا للكوارث , والأولى بهم إقامة بطولة الدورى وكأس مصر خاصة ان الأندية تحتاج إلى إستئناف النشاط لتحقيق موارد مالية يستطيعوا من خلالها إعطاء اللاعبين كافة مستحقاتهم. - هل كانت ستتحقق أى مكاسب من وراء الدورة التنشيطية ؟ - لاطبعا.. هي مجرد تهريج وتضييع وقت فقط فكنا من الممكن ان تلعب بطولة كأس مصر لتكون البديل الأمثل عن إلغاء بطولة الدورى ونبدأ الموسم الجديد فى شهر مايو المقبل والحمد الله انها اتلغت. - لكن إقامة الكأس مصحوبة بالعديد من الأعتراضات وعلى رأسها رفض الأهلى الإشتراك فى تلك البطولة ؟ - القانون لابد ان يسير على جميع الأندية سواء الكبيرة أو الصغيرة وبصراحة اللى مش عايز يطبق القانون مع السلامة ومش هنفصله على مزاج كل واحد، ولو لعبنا من غير الأهلى والزمالك مش هنموت والدنيا هتستمر بدون أى مشاكل. - إنسحاب القطبين ربما يدفع الرعاه لعدم إقامة أى بطولة ونعود لنقطة الصفر ؟ - الأهلى والزمالك فى موقف القوة الأن وإتحاد الكرة يخضع لكل قرارتهم ويوافقهم على أى شىء لكن لو الجبلاية صممت على إقامة البطولة وكان لها رأيا إنفرادى ستجد الأمور مختلفة وسيوافق الكبار على اللعب تحت أى ظروف. - وما سبب حالة التخبط التى نعيشها؟ - سنظل نعيش حالة التخبط حتى يأتى مسئول يراعى الله ويعمل الصح وميخفش ويسير على اسس وقانون لكن مشكلتنا ان كلنا "جبناء" مع إحترامى للجميع ومفيش حد عايز ياخد قرار كل لا تتم مهاجمته، ويتحمل المسئولية ، وكل واحد بيسحبها غلط ويفضل إنه يصالح الجمهور ويعادى الرياضيين وده غلط لأنك مهما عملت مش هتقدر ترضى الجماهير التى لن ترضى عن أى شىء وكل واحد له فكر واراء ولو معملتش اللى هو عايزه هياجمك، ومفيش حاجة إسمها هعمل اللى جمهور عايزة والأحسن بقا نعد فى بيتنا لحد ما حق الشهداء يجى. - وما أضرار ذلك على الكرة المصرية؟ - تقدر تقولى هناكل ونشرب منين وهنلعب منين ولو كل لاعب سافر هيكون خراب على الكرة المصرية ومفيش حد حاسس بالأمن والأمان فى بلده وناس كتير مش عارفه ان محدش هيرضى يجى مصر يلعب بعد كده بسبب عدم قدرتنا على التأمين وهنلعب مبارياتنا فى الخارج، للأسف الشديد اللى عمله حسن شحاتة فى السنوات الماضية من إنجازات وتاريخ هيضيع بعد ما أوروبا بقت تخاف من مصر والإنجازات الكثيرة التى حققها اللاعبين المصريين وهنرجع 20 سنه لورا بسبب عدم القدرة على إتخاذ قرارات ومحدش هيعملنا حساب فى أى مكان. - وهل ما يحدث سيدخلنا لنفق مظلم لايعلم نهايته إلى الله؟ - طبعا أوافقك فى كلامك وربما لا نخرج من هذا النفق والبداية كانت بعدم التأهل لكأس الأمم الأفريقية ومحدش حاسس ان فى دول بتتسحب ولو فضلنا كده فى حالة عدم الوعى والنسيان مش هناخد بطولة كأس الأمم تانى عشان خريطة الكرة بتتغير فى أفريقيا ، وأكبر دليل كمان مباريات الأهلى والزمالك فى أفريقيا فى البداية كنا بنلعب عشان نكسب بره وجوه لكن دلوقتى الوضع تغير والزمالك كسب يانج أفريكانز بطل تنزانيا بهدف "يتيم" وطلعنا نقول الحمدلله ومبسطوين وكله بيسلم على بعضه. - وما حلولك للخروج من تلك الأزمة ؟ - المنظومة كلها بايظة لازم تتغير والحل السريع هو تغيير القوانيين الخاطئة وتضع قوانيين تسير على الكبير قبل الصغير والكل لازم يحترم قوانين وسياسة الدولة ومينفعهش تمشى الدولة على مزاج النادى بتاعك ونضع عقاب واحد على الجميع ، اليوفنتوس الإيطالى هبط للدرجة الثانية والدورى الإيطالى اتلعب وزى ما عايز تعمل دورى محترفين يبقا إحتراف فى كل حاجة ومفيش أى مجاملات ونفكر فى مصلحة البلد دلوقتى.. إحنا محتاجين كل واحد يشتغل بجد ولٍلأسف وصلنا لمرحلة المواطن العادى بيتكلم فى السياسة والسياسى بيتكلم فى الكورة. وكفاية ان واحد قالك مش داخل انتخب انا داخل اتصور ومش فاهم ازاى لو عايز ترشح نفسك تجيب 30 الف صوت ده انا لو داخل إنتخابات الزمالك هجيبها والصح يكون 2 مليون صوت مثلا . - وهل إستقريت على المرشح الرئاسى القادم؟ - هعمل زى ما عملت فى مجلس الشعب هعدو اشوف برنامج كل واحد واللى هيقنعنى وهيكون منطقى هختاره . - الكل أصبح شبه بعضه ولا فرق بين المرشحين فما رايك؟ - احنا عايزين واحد محترم وأهم حاجة نسيبنا من حتة الفلول ..وبقي كل واحد يسلم على الرئيس السابق او يقول كلمة في حقه يبقي مجرم وفلول ونسيوا ان الرئيس لو نزل الشارع زمان كله كان هيموت ويسلم عليه ووصلنا لمرحلة كل واحد عايز يمشي الدنيا بمزاجهى دماغ التانى ويستغل الثورة ... ياجماعه عايزين نفوق الثورة خلصت .. فإذا كان لاعبى الكرة المفترض انهم أغنياء ويمتلكوا الملايين يشتكوا الان بسبب الظروف المالية الصعبة فما حال العامل الذى يحصل على 200 جنيه بصراحة احنا داخلين على ثورة جياع . - رغم حالة الإستقرار فى المقاصه طوال السنوات الماضية لكن ظهرت نغمة جديدة وهى تذمر اللاعبين بسبب عدم حصولهم على مستحقاتهم؟ - الأمور اتفهت غلط واللاعبين كانوا مضايقين ليس بسبب عدم حصولنا على مستحقاتنا المتأخره ولكن لعدم جلوس المسئولين معنا وتحديد موعد نهائى لصرف المستحقات .. الحمدلله علاقتنا بالشركة كويسه و احنا مقدرين الظروف اللى بيمر بها النادى ولو قالوا السنه ديه مفيش فلوس برضو هنكمل ومفيش مشكلة لإن الناس محترمه جدا وياما وقفت جنب اللاعيبه .. بصراحة إدارة المقاصه من اكثر الأندية إحتراما وانا لعبت فى أندية كتير لكن المسئولين فى النادى الفيومى يقدروا اللاعبين بشكل رائع.
