.. ولا ملام علي بن همام

تردد علي مدي الأيام الماضية اسم محمد بن همام.. لفت الاسم انتباه فكورة مشجع الكرة وابن صاحب مقهي الرياضيين المشهور.. سمع فكورة عن دور ابن همام في انتخابات الاتحاد العربي، وعن المشاكل التي كان سبباً فيها بين سمير زاهر رئيس اتحاد الكرة المصري ونائبه هاني أبوريدة.
شد فكورة الرحال لمقابلة ابن همام لكي يقول له كلمتين في إصلاح ذات البين.
وفي مجلسه العربي جلس الرجل القطري وأمامه دلة القهوة العربي ليستمع إلي كلام فكورة الذي قال له: شوف يا أبوجاسم أنا من الآخر عارف انك راجل مغلوب علي أمرك وان عمايلك مش من دماغك انت يا ولداه مغلوب علي أمرك مش كده والا إيه!
التزم ابن همام الصمت فهذا الكلام لا يمكن الرد عليه، ولأن أصول الضيافة العربية لا تسمع له بالاشتباك مع ضيفه سكت ليواصل فكورة كلامه: يا عم محمد احنا عارفين انك راجل عروبي وبتحب الزعيم الراحل جمال عبدالناصر وانك أحياناً مبتكونش راضي عن بعض المواقف اللي بتحصل ولكن حكم القوي علي الضعيف.. علشان كده أنا شخصياً عازرك.. لكن المساكين اللي مش عارفين ان هناك سياسيين طايحين وبيعملوا حاجات ومحتاجات وعايزين يحطوا راسهم براس أرض الكنانة عقليات ونفوس تعبانة!
اتسعت حدقتي رئيس الاتحاد الآسيوي وعضو الفيفا وهو يسمع هذا الكلام غير مصدق.. ولم ينتظر فكورة أي رد فعل ليواصل كلامه عن الموقف الأخير، ويقول: يا أخي الواحد منا جواز سفر هو جنسيته وهويته ومن غيره يبقي بدون بلد تسنده حتي لو كانت أد عُقلة الصباع!
وفيه حوالي 6 آلاف واحد صحيوا الصبح لاقوا روحهم من غير جوازات.. طارت الجنسيات وخرجوا من أرضهم والخوف من مصيرهم هو اللي بيخلي الناس تعمل حاجات مش عايزاها ولا حباها ما هو برضه الجواز غالي، والواحد مالوش غير جوازه.. والجواز في حالاتكم مش ملك اللي شايله ده ملك اللي بيديه مش كده والا إيه!
ظهر الإحمرار علي وجه ابن همام الأسمر ولكن فكورة عاجله قائلاً: يا أبوجاسم أنا في الآخر حقول كلمتين إن كان اللعب علي الحبلين مكشوف فالداخل بين المصريين حيشوف ان كنت لعبت مع روراوه ضد زاهر وفاكر ان محدش عارف وممكن أبوريدة يكون مصدق انك تعبت علشان تنجح زاهر فاحنا نصدق لو كنت بتعمل من دماغك، إما ان العملية لعبة سياسية ودخلت فيها مصر والسعودية فالعب غيرها ومتشكرين متبقاش تتعب نفسك تاني.. راجلنا حينجح من غير مجهودك بس ابعد عنه فلوسك اللي دخلت جيوس ناس بايعين لأن اللي اشتري منك بكره يبيعك!