الريحة فايحة من زمان فلوس البترول «بح»

سقطت امبراطورية البترول الكروية التي نهبت فلوس المصريين برحيل الوزير الهمام سامح فهمي.. أنا لا اشكك في ذمته لا سمح الله.. ولكني اشكك في مشروعية تصرفه في فلوس البلد بفتح أندية كورة ورياضة وتنصيب نفسه راعي للحركة الرياضية والرياضيين.. فلوس بالملايين ويمكن بالمليارات التي أصبحت كالملاليم في عرف النظام الفاسد اتصرفت علي أندية الكورة بشكل غير مشروع ولا منطقي ولا يفهمه أي عاقل.
يعني ايه تصرف الوزارة البترولية وتبني استاد لمجرد أن طلع في دماغها أن تبني.. ولما هو يبني آمال وزارة الرياضة تعمل ايه.. ولما هو يكون نادي ويصرف عليه فلوس البترول آمال المجتمع الاهلي يعمل ايه.. لما هو يشتري لاعبين أجانب بملايين المصريين الفقراء ، امال اللاعبين المصريين يلعبوا فين وامتي وازاي.
أنا عارف ان سيادة الوزير لم يفعل ذلك من نفسه ولكن بدفع وارغام من الدلوعة »جمال« ابن صاحب العزبة ومن طنط مرات صاحب العزبة.. عاوزين أماكن نظيفة وأندية »فايف ستارز« مش مهم حتتكلف كام.. ما هي فلوس البترول كتير.. فلوس النفط خسارة وحرام تنصرف علي الغلابة اللي بيقفوا في طابور العيش.
كلامي القاسي ده مش النهاردة بس.. ارجعوا الي كل ما كتبت واشرت اليه علي مدار العامين الماضيين منذ ان فاحت الريحة الوحشة.. يا خسارة يا مصر.. المهم أن نبني من اليوم.