يسقط يسقط رأي النخبة

شعار يتردد في اذهان الكثير من عامة الشعب .. الناس الغلابه اللى بتتفرج على برامج التوكشوز ويجبها رأى ويوديها رأى وبين وجهة نظر واخرى قرر الشعب المصرى تخليه عن النخبه وفوض الرئيس مرسى فى عمل ما يراه سيادته , وكفى المؤمنين شر القتال وملعون دى سياسه اللى هتفرق بين الاخوات يا جدع , ابعد عن القوى الوطنيه وغنيلها .. الناس دى عمرها ما هتتفق على حاجه ابدا .. اعتراض من اجل الاعتراض نقد من اجل النقد وخلاص .. ربنا يوفقك ياريس ويخليك لينا ويحميك ويحمينا من النخبه دى.
دا فى الغالب رأى الناس دلوقتى .. فى نخبتها .. اه والله والنيعمه كمان..
عارفين لما الناس فى الشوارع تكون فرحانه بقرار من رئيس الجمهوريه وتخرج النخبه بالليل تنكد عليهم بجو المؤامرات والكواليس الخفيه وشغل كرومبو ده .. اشى خبير استراتيجى وناشط سياسى وحقوق انسان وصحفى كمان , دا شايف ان القرار بيخدم فئه واحده وهى جماعة الاخوان , ودى شايفه ان القرار مش كفايه وبعيد عن المأمول من الرئيس .. ولا الاتصالات التليفونيه من القوى الوطنيه المتعدده والمشرزمه .. دا معترض ودا زعلان ودا بيندد .. طيب وبعدين .. الناس زهقت من الهرى دا , ارحمونا بقى.
الى النخبه .. انتوا بتحرقوا نفسكم بسرعه .. حقيقى فعلا .. ده انتوا اسرع من البنزين فى الاشتعال .. رصيدكم نفذ عند الشعب خالص مالص بالص .. يخربيت كده بجد , بالشكل دا مش هنلاقى حد يعارض مرسى والناس تصدقه .. انتوا سوأتوا سمعة المعارضه وقللتم من حجتها وشعبيتها وسط الناس .. الشعب دلوقتى شايفكم مغرضين .. عايزين تسقطوا الراجل وخلاص , اخركم القنوات الفضائيه ومواقع التواصل الاجتماعى .. منفصلين تماما عن الشارع .. حسبى الله ونعم الوكيل فيكم .. طيب اعارض انا ازاى دلوقتى!!
الى رئيس الجمهوريه .. آحبيبى آمرسى .. شاطر وربنا .. مرسى يسير بخطى ثابته فى حين النخبه تصرخ وتخون بعضها البعض والناس فقدت الثقه فيهم وشايفه دلوقتى ان الرئيس هو الملجأ والملاذ .. استااااااااااااذ على رأى اونكل وديع .. مرسى هو كمال ابو ريه ومحمود الجندى فى الدراما المصريه .. والنخبه هى غاده عبد الرازق فى اى فيلم من افلام خالد يوسف .. ايون , اقصد اللى فى دماغكم.
نصيحه لنخبتنا .. مش مطلوب منكم انكم تنافقوا الرئيس ولا تطبلوا لقراراته .. ابسلوتلى .. اعترضوا وانقدوا وفهموا الناس وجهة نظركم بشكل مبسط ومن غير غل ولا رغبه فى اسقاط مرشح اتى بانتخابات نزيهه اغلبكم شارك فيها سواء مراقبه او تعليقا عليها.
ملاحظه اخيره .. انا ليبراليه .. برادعاويه .. وقريبا فى حزب الدستور .. ومش ناشطه .. الحمد لله , وبشجع الاهلى . واخد بالك يا ريس