كتبت : هبه فرج ... كلمة فل هى أكتر كلمة اتقالت على مدار السنة ونص اللى فاتت، بس فى الحقيقة على قد ما الكلمة دى لخصت كلام كتير قوى كان ممكن يتقال فى حق ناس بتكره الحرية وبتعشق الاستعباد، على قد ما الكلمة دي كانت سبب فرقتنا وتقسيمنا وأحيانا خناقاتنا، أكيد وأنت راكب مترو أو قاعد فى تجمع شفت احتدام فى الرأى يصل لحد الخناقة بين ابن من أبناء مبارك وبين ابن من أبناء الحرية، ومش كده وبس ده كمان فى الانتخابات الرئاسية فى فرنسا تعدى أحد المصريين على مصرية زيه علشان بتهتف لشفيق، مش مزعلنى نخوة الرجاله اللى ضاعت ولا ثقافة الاختلاف اللى مش موجودة عند المصرى حتى ولو سافر وعاش فى أوروبا، أنا اللى مزعلنى الناس اللى بتشوه الثورة بتصرفاتها واستبدادها برأيها، الناس بتبص للفل ده كأنه صهيونى متطرف مش مصرى زيه زيهم، بس كل الحكاية إنه دماغه متركبة بطريقه معينة، والمشكلة فى الفل بقى أنه بيعرف يسوق لنفسه برة كويس، يعنى مثلا الست اللى انضربت فى فرنسا من شاب أقل ما يقال عنه أنه أهوج بصت للكاميرا على طول وقالت هى دى الديمقراطيه اللى أنتوا عايزينها، أعرف واحد قريبى فل سافر المانيا فى شغل كان فرحان قوى وهو بيتكلم مع الألمان عن أن مصر دلوقتى مفتقدة الأمن والأمان، وأن مش هيجى تانى زى عصر مبارك، هو مش واخد باله إنه بكده بيضر بسياحة بلده، المهم عنده يثبت إزاى إنه ك «فل» صح علشان كده أنا شايفة إن الحكاية دى مش هتتحل إلا لو شيلنا كلمة فلول دى خالص من قاموس حياتنا بعد ما ننتخب الرئيس، يطلع بقى زى ما يكون نرضى بيه ونبقى فلولى وثورى إيد واحدة.. نبقى مصريين بجد.