الله عليك يا عبده لما شحططت عم جادليو على المسرح و قلت "نعم" بالفُمّ المليان، ما كنتش تعرف إن حييجى اليوم و "نعم" تعمل مشاكل!!! طيب قبل ما تهاجم شوف كده ليه تقول نعم: • قول نعم علشان تعيد الحياه لدستور 71 و يصبح الجيش بدون شرعية و تبدأ الصراعات على السلطة بجد. مش هو ده إللى حيحسسك بإستقرار؟ • قول نعم علشان نعمل إنتخابات مجلس الشعب بعد شهرين و يبقى عندنا برلمان، بس مش أى برلمان بقى، ده حيبقى 50% عمال و فلاحين و معظمه إخوان و وطنى، مش هو ده البرلمان إللى حيعبر عن رأيك؟ • قول نعم علشان المجلس إللى حيتشكل كمان شهرين هو إللى حيشرف على اللجنة التأسيسة فى وضع الدستور الجديد. مش كده حتكون مطمئن إن الدستور الجديد حيعبر عن رغبة الشعب إللى إنت منه؟ • قول نعم علشان لما الرئيس الجديد ييجى على الدستور المليان بالصلاحيات هو حيطلع راجل طيب و ابن حلال و مش حيستغل الصلاحيات و يبقى ديكتاتور. مش إنت و الريس إللى جاى عِشرة عُمر و حاطط فى بطنك بطيخة صيفى من ناحيته؟ • قول نعم علشان الإستقرار و الإقتصاد يرجعوا تانى. مش الدستور ده هو إللى كان عامل لنا إستقرار و إقتصاد زى الفل؟ • قول نعم علشان الشهداء و أهلهم يرتاحوا. مش هُمَّ كده حيرتاحوا لما نقول نعم و يحسوا إنهم ما ضحوش بعمرهم على الفاضى؟ • قول نعم علشان ما تنتشرش الفوضى. مش لما كانوا بيقولوا نعم لمبارك بالنيابة عنك ما كانش فيه فوضى؟ • قول نعم علشان الشباب إللى قام بالثورة ما يلحقش يشكل أحزاب و يشارك فى الحياه السياسية و تقتصر على الإخوان و الحزب الوطنى طول فترة المجلس إللى جاية. مش هو ده العدل؟ • قول نعم علشان هو ده إللى حيخلّى مصر تتقدم. مش التقدم ما ينفعش ييجى على نضيف و لازم يتبنى على بقايا القديم؟ • قول نعم علشان تنام و إنت ضميرك مرتاح. مش إنت كده تبقى عملت إللى فى مصلحة البلد و ما دوّرتش على مصلحتك الشخصية؟ • قول نعم علشان إنت ما بتحبش الطمع، إحنا كنا فين و بقينا فين و كده أحسن من مافيش. مش كفاية كده و نرضى بقليلنا و بلاش نحاول نبقى زى دول العالم المتقدمة؟ • قول نعم علشان لما إبنك يكبر و هو بيذاكر التاريخ يسألك قلت إيه فى الإستفتاء على تعديلات الدستور بعد الثورة إللى أسقطت مبارك و نظامه، تقول له قلت "نعم". مش إنت كده حتقدر تبص فى عينه و تقول له أنا كنت بفكر فى مستقبلك؟ فكر كويس قبل ما تشحططت عم جادليو و تشحططنا كلنا معاك علشان تقول "نعم" و بعدين ترجع تقول بعدها: " كنتى فين يا لأه لما قلت الآه؟"
